E 📀

شرح سالفة PHP بالتفصيل وباللهجة الكويتية 🇰🇼💙 شنو اللي صار بـ PHP وخلى هالثغرة تصير؟ ​الكلام هني حق الناس اللي تبي تتعلم عشان تفهم السالفة تكنيكال وبشكل مبسط، وخلني أقولك بدون تعقيدات وتفاصيل عميقة شنو اللي صار بالضبط. ​ شوف يا محفوظ السلامة! تخيل إن عندك موقع يخليك ترفع ملفات وشغال بلغة PHP، وفيه ميزة اسمها session.upload_progress، وظيفتها تتابع جم وصل رفع الملف، عشان الموقع يقدر يقول حق المستخدم ترى الرفع وصل مثلاً 50%، وهالبيانات تتخزن بالـ Session. ​الـ Session ببساطة عبارة عن مساحة السيرفر يحتفظ فيها ببيانات تخص دشتك للموقع، وإذا اشتغلت ميزة متابعة الرفع بالشروط المطلوبة، يتسجل فيها اسم الملف وجم بايت وصل، وغيرهم من معلومات الرفع. ​ هني الهاكر فكّر: دام اسم الملف اللي قاعد أطرشه قاعد ينكتب ويتسجل بالسيرفر، شنو اللي يمنعني أحط داخل اسم الملف نفسه كود PHP؟ وفعلاً طرش اسم ملف داخله كود، وتسجل مع بيانات الـ Session، بس لي هني الكود بعده ما اشتغل، لأن السيرفر قاعد يتعامل وياه كأنه نص عادي مو أكثر. ​الحين الهاكر يبي له طريقة تخلي السيرفر ينفذ هالنص المكتوب، فقام يدور على غلطة ثانية بالموقع اسمها Local File Inclusion أو LFI، وبهالحالة هالغلطة تخليه يقدر يتحكم بمسار الملف اللي الموقع يمرره حق فنكشن اسمها include(). ​إذا الـ Session متخزنة بملف، والهاكر قدر يصيد مكانه، والموقع عنده صلاحية يقراه، عيل هني وصل حق اللحظة اللي النص اللي كتبه يتحول لكود فعلي يتنفذ على السيرفر! يعني يصير عنده صلاحيات نسميها Command Execution، وبالمعنى المبسط يقدر ينفذ أوامر على السيرفر جنه داش عليه بـ Access مثل الـ SSH، ويقدر يكتب أوامر عادية نفس ls و rm و whoami وما عنده أي مشكلة. ​ بس فيه نقطة وايد مهمة: بيانات متابعة الرفع تنمسح باي ديفولت (تلقائياً) أول ما يخلص الرفع، عشان جذي الهاكر يحتاج يخلي الموقع يبطل ملف الـ Session والملف قاعد يرفع، يعني قبل لا تنمسح البيانات. ​زين، هل معقولة أي موقع PHP فيه رفع ملفات خلاص راح يخترق بهالطريقة؟ لأ، لازم تتيمع كل هالشروط مع بعض: ميزة تتبع الرفع تكون شغالة، والـ Session متخزنة بملف يقدر الموقع يقراه، ويكون فيه ثغرة LFI توصل الملف حق include()، لأن مجرد قراءة الملف وعرض محتواه كنص ماراح يشغل الكود. ​الحل الأفضل الحين واللي أغلب الناس قاعدة تنصح فيه هو إنك تسكر وتلغي session.upload_progress نهائياً من الـ configuration files، عشان تسلم من عوار الراس والمشاكل ليمن تنحل السالفة رسمياً من تيم مطورين اللغة. ​وعسى الله يستر على النت هالأيام!