Amr arafa

بركات اسطورة الاهلي ومنتخب مصر امبارح على الهواء --> "لا صلاح ما كانش ليه اي علاقة بقرار تعيين حسام بالدعم او الرفض، وانا كنت في المجلس، عيب اوي الكلام ده" مافيش مدرب مسك منتخب مصر وحصل مشكلة واحدة ليه مع صلاح صغيرة او كبيرة، من بوب برادلي ل كوبر لكيروش كله بيتكلم على الاحترافية وإنه قدوة لكل اللاعيبة وبيساعد المدرب بالتزامه مش العكس… وكل المدربين دول جم ومشيو او اترفدو عادي.. كيروش بعد الرفد جريو وراه يرجعوه وهوا اللي مرضيش (ما سمعناش عن صلاح بيتوسط لإرجاعه وإرضاء الشعب بدل ما تجيبولي حسام حسن اللي عندي معاه مشاكل قد الدنيا) لعبنا امم أفريقيا، صلاح:- ده احلى تجمع ليا مع المنتخب في حياتي .. ده تجمع المغرب مع التوأم اللي مكانش عايزهم ييجو. رحنا كاس العالم… الدنيا عنب واللاعيبة والمدرب بعد كل ماتش بيرقصو في الشارع قدام الفندق مع بعض والأجواء جميلة… وحسام وصلاح زي العسل والناس مبسوطة حتى بعد ما خسرنا من الأرجنتين .. الكل رجع سوا على تكريم رئاسي واتوبيس مفتوح واحتفال في الستاد. بعدها وفي آخر ٣ شهور وبدون انذار مسبق المدرب يبدأ مشاكل كبيرة خارج الملعب تنتهي بمنعه من الحديث الإعلامي من لجنة عليا ليس لها علاقة بالكورة… وفي الكورة خناقات مع مصطفى محمد (قبل كاس العالم وجرت معاها خناقات على الاختيارات من جمهور الزمالك) + خناقة المغرب في امم أفريقيا مع الصحافة + الشنواي (والاهلي نزل بيان رسمي ضد المدرب وحقه) + عبدالمنعم (في خناقة ضد تقرير طبي من د. ابو العيلة واتقالو مش هتيجي ثاني) + خناقة صلاح في التبديل بدري والتعادل مع أنجولا في مصر + التلفظ على اللعيبة على الخط في نفس الماتش (زي ما اتحكى من الصحفيين بشتيمة) + خناقة مع اتحاد الكورة ورئيسه على ماتش جنوب افريقيا اللي هوا عارف ان بينهم خلاف مع انهم لسة مجددين عقده + خناقة مع الدوري كله انه فاضي ولاعيبته عيانة وانا اللي برجعهم + خناقة مع خالد الدرندلي رئيس البعثة ونائب الاتحاد ويخاصمه طول السفرية + خناقة مع اي حد يمتلك رأي معارض حتى في الكورة ووصفهم انهم مش مصريين بعد هزيمة أوزبكستان. كروياً بقا كل واحد يقول اللي عايزه.. زي ما في ناس شايفة نجاح عظيم لحسام حسن كمدرب هما نفسهم ممكن يكونو شايفين ان صلاح ما عملش حاجة للمنتخب.. مع انه كابتن الفريق واكثر لاعب جايب اجوال وعامل مساهمات في فترة نجاح حسام حسن نفسه.. بس عادي دا آراء كورة وكل واحد حر. بس في وسط كمية الخناقات والمشاكل اللي مع كل الأطراف جوا وبرا الملعب .. اعذرني اني مش هقدر اصدق شادي حبشي واكذب محمد بركات، ان صلاح وهوا اللي مشى حسام حسن زي ما جابه وجاب اللي قبله واللي بعده علشان هوا اقوى من الكل ومش قدوة.. يعني حسام كان خلاص تغلب على كل خصومه داخل وخارج الملعب لكن صلاح هوا اللي قال نووو.. ازاي تخرجني في الدقيقة ٦٠ .. حسام يمشي يا مش راجع! عامتاً أنا كدة كدة اكيد بعرض لصاحبي ف كدة كدة كلامي خفيف ومالوش ثقل .. بس كل اللي فوق ده وقائع ومش رأي، رأيي في اقالة حسام قلته في التويتة اللي فاتت ..