آبو البـــــدر 💛🖤🇸🇦

حط نفسك مكان فايز المالكي وتعال نتخيل كيف يعيش يومه @fayez_malki تصحى الصباح وتفتح إكس تلقى مئات الرسائل تروح للواتساب تلقى مثلها تفتح السناب ونفس الحكاية اتصالات من أصدقاء ومعارف وناس ما تعرفهم هذا عنده مريض وهذا عليه دين وهذا يبي بيت وهذا عنده سجين ينتظر الفرج وكل واحد منهم يشوف إن قضيته أهم قضية وإنك أنت الأمل بعد الله في حلها طيب بسألك بالله كيف بترد على هالناس كلهم؟ ومن وين بتجيب الوقت والطاقة والصبر عشان تسمع لهم وتتابع قضاياهم؟ ترى أبسط شيء يقدر يسويه فايز اليوم إنه يعتزل السوشل ميديا ويكبر راسه ويعيش حياته الرجل عنده من الشهرة والخير ما يغنيه عن وجع الرأس هذا كله ومع ذلك لا يزال حاضر ويسعى ويساعد ويتحمل وقسم بالله لو تجلس تحصي أعماله الخيرية وقصص الناس اللي وقف معهم ما يكفيك أسبوع بل ستتفاجأ من الحالات الي ماخرجن للناس أنا شخصيًا لما اشتغلت على حلقة عن حياته اكتشفت قصص ومواقف ما كنت أعرف عنها شيء رغم إني أتابعه من سنوات وبعد هذا كله يجيك واحد يبحث عن ترند ويختصر تاريخ الرجل في تصريح أو موقف ما أعجبه ويبدأ يسيء له! أنا ما أقول إن فايز معصوم ولا منزه عن الخطأ هو بشر يخطئ ويصيب ومن حق أي أحد ينتقده ويختلف معه لكن فيه فرق بين النقد والإساءة وفيه فرق بين محاسبة الإنسان على موقف وبين محاولة هدم صورته وتاريخه كله واللي أخشاه مو على فايز وحده أخشى إن فيه ناس اليوم عندهم القدرة والرغبة في مساعدة الآخرين ويشوفون اللي يصير له ويقول الواحد منهم بينه وبين نفسه إذا هذا فايز المالكي بكل اللي قدمه ما سلم من الهجوم والإساءة أجل أنا وش بيصير فيني؟ وهنا المصيبة إننا بدل ما نشجع الناس على فعل الخير نصير سبب في ترددهم عنه انتقد فايز مثل ما تبي لكن لا تنكر خيره ولا تظلمه الإنصاف جميل والأجمل إننا نحافظ على الشخصيات اللي سخرت شهرتها لخدمة الناس بدل ما نكون سبب في إبعادها عنهم