من الخاص 📩 أمس اكتشفت إن زوجتي من ستة شهور وهي تستلف من أختها عشان تغطي مصاريف البيت ما كنت أدري عن الموضوع أبد أنا موظف وراتبي 11800 وعندنا خمسة أطفال علي قسط عقاري 4350 وقسط سيارة 1420 ومن بداية السنة صارت مصاريفنا تزيد بشكل ملحوظ كنت أعطي زوجتي 2800 شهريًا للمقاضي واحتياجات البيت وكل ما قالت المبلغ ما يكفي أقول لها حاولي ترتبين المصاريف قبل يومين اتصلت علي أختها وقالت أبيك تعرف إن أختي عليها لي 19 ألف ريال استغربت وسألتها من وين جاء هالمبلغ قالت زوجتك كل شهر تطلب مني ألفين أو ثلاثة عشان تكمل مصاريف البيت والعيال واجهت زوجتي بالموضوع قالت والله ما كنت أبي أثقل عليك وأنت شايل أقساط البيت والسيارة قلت لها طيب ليش ما علمتيني بدل ما تتراكم عليك الديون قالت كل مرة أقول لك المقاضي غليت تقول إني ما أعرف أدبر الفلوس هنا سكت لأني تذكرت فعلًا إني كنت أردد هالكلام لكن اللي صدمني أكثر إنها قالت إنها باعت ذهب لها قبل أربعة شهور بمبلغ 13 ألف وصرفته على احتياجاتنا قلت لها ليش وصلنا لهالمرحلة وأنا ما أدري قالت لأنك تحسب إن كل شيء بالبيت ينتهي بمجرد ما تحول لي المصروف جلست بعدها أراجع حساباتي اكتشفت إني أدفع شهريًا اشتراكات وطلعات ومصاريف شخصية تتجاوز 1600 ريال وبنفس الوقت كنت ألومها إذا طلبت زيادة 500 ريال للمقاضي أمس قلت لها من الشهر الجاي بنجلس سوا ونحدد ميزانية واضحة للبيت قالت الميزانية مهمة بس الأهم إنك تصدقني يوم أقول لك ما يكفي والله إن كلامها للحين في بالي أنا طول الفترة الماضية كنت مقتنع إني مو مقصر مع بيتي لكن يوم عرفت إنها تستدين وتبيع ذهبها عشان ما تطلب مني زيادة حسيت إني ما كنت شايف الصورة كاملة والحين أول شيء أبي أسويه أسدد دين أختها وأرجع لها قيمة ذهبها لكن عندي سؤال شاغلني كيف الواحد يعرف إنه فعلًا يعطي بيته كفايته مو بس يعطي المبلغ اللي هو يشوفه مناسب؟

من الخاص 📩 بنتي عمرها 19 سنة وتدرس بالجامعة ومن يوم توظفت جزئي وهي تجمع من مكافأتها وراتبها أبوها طلب منها تشاركنا بمصاريف البيت بـ900 ريال شهريًا لأنها صارت تشتغل قلت له خل البنت تجمع لمستقبلها قال لازم تتعود على المسؤولية من الحين البنت سمعت نقاشنا وقالت بعطيكم اللي تبونه بس لا تحسسوني إني صرت عبء عليكم

من الخاص 📩 فتحت بقالة قبل 3 سنوات برأس مال 92 ألف مبيعاتها بالشهر 31 ألف لكن الصافي ما يتعدى 3400 جاني واحد يشتريها بـ 125 ألف شامل البضاعة أبيع وأطلع بفلوسي أو أستمر وأحاول أرفع الأرباح مع اني خسران عليها واجد ديكورات وحوسه بس اكلتني رواتب العمال والبضائع افيدوني انتم وش رايكم بالعرض ؟؟؟

من الخاص 📩 زوجتي ولدت قبل 5 شهور وقررت تمدد إجازتها بدون راتب راتبي 7850 وإيجارنا 2600 وقسط السيارة 1190 أم زوجتي عرضت تهتم بالطفل عشان ترجع زوجتي لدوامها وانا ماودي الطفل يتعود على غيرنا وبالاخص خواله ودي انه معنا فا ما اعرف وش اسوي

من الخاص 📩 أنا موظف في شركة شبه حكومية وعمري ٣٤ سنة راتبي الحالي ١٦٨٠٠ ريال ولله الحمد معي بكالوريوس هندسة وماجستير إدارة أعمال وعندي ٨ سنوات خبرة وكم شهادة مهنية أخذتها على حسابي قبل أسبوعين جاني عرض من شركة كبيرة براتب ٢٧٥٠٠ ريال ونفس تخصصي تقريبًا الفرق بالشهر أكثر من ١٠ آلاف ريال يعني بالسنة فوق ١٢٠ ألف المشكلة إن وظيفتي الحالية مستقرة والدوام مريح ومديري متفاهم وعندي وقت لزوجتي وعيالي أما الشركة الجديدة دوامها طويل وفيها ضغط وسفر بين المدن والعقد سنوي يتجدد يوم علمت زوجتي بالعرض فرحت وقالت هذي فرصة ما تتعوض خصوصًا إن علينا تمويل عقاري وقسط سيارة ومصاريف ثلاثة أطفال لكن أبوي يوم شاورته قال لي كلمة للحين أفكر فيها قال لا تبيع راحة بالك بعشرة آلاف وتندم يوم ما ينفعك الراتب واللي زاد حيرتي إن واحد من الشباب كان يشتغل عندهم وقال لي رواتبهم ممتازة بس الموظف عندهم ما يضمن بكرة أنا الحين محتار بين وظيفة مرتاح فيها ومستقبلي واضح وبين راتب ممكن يغير وضع عائلتي بالكامل هل فعلًا الاستقرار الوظيفي يستاهل أتنازل عشانه عن فرق راتب يتجاوز ١٢٠ ألف بالسنة؟

من الخاص 📩 السلام عليكم، حابة أتكلم عن موضوع مهم وآخذ آراءكم. أنا موظفة وراتبي 3500 ريال، وعقدي باقي فيه تقريبًا 6 شهور، وجاني عرض وظيفي من شركة ثانية براتب 10,000 ريال، ومستعدين يتحملون تعويض إنهاء عقدي الحالي. المشكلة إن شركتي الحالية رافضين خروجي ومتمسكين فيني، وكل ما طلبت أطلع يقولون إن الشركة ما تقدر تستغني عني، وصرت أعيش ضغوط كبيرة بسبب محاولاتهم إني أستمر معهم بالكلام العاطفي. أنا مقدّرة احتياجهم لي، لكن عندي مستقبلي والتزاماتي المادية، والفرق بالراتب كبير جدًا. سؤالي: لو أنتم مكاني، تختارون مصلحتكم وتنتقلون للوظيفة الجديدة، أو تراعون الشركة الحالية على حساب فرصة ممكن تغيّر وضعكم المادي؟ وهل أنا غلطانة إذا اخترت مستقبلي؟

من الخاص 📩 انا طبيبة اسنان خريجة جامعه حكومية كانت الدراسة صعبه جدا ٧ سنين والحمدلله عدت واخذت التصنيف واشتغلت كاشير ب١٧٠٠ وبعدها طلعوني ولقيت وظيفة مساعد طبيب اسنان واشتغلت مع اطباء اجانب طلعو عيني واستقلت وحاليا اشتغل بمجمع براتب ٧٠٠٠ والرواتب لاطباء الاسنان ٩٠٠٠ هل اطالبهم بالزيادة علما باني بفترة تجربة علما باني قدمت باماكن كثير وكلهم يبغون خبرة عمليه بالسنين ولما اقولهم عندي اتاتشمنت ما يقبلون