راع البلها

قصيدة الشاعر الكبير عبدالله بن زويبن المعمّري، في الشيخ شديّد بن محمد الهمّاش الجحدري القحطاني، رحمهما الله: سلام تسليمٍ مثل ريحة الهيل من دلة اللي في حفونه يكيلي ما يشري إلا بالقطم والسرابيل ما قط بهرها من الجنزبيلي يدفع من أقيام البهم والمخاليل واليا انزنق يفهق عليه العميلي اليا استدار الظل صف المعاميل على قطر منساب كسر الكحيلي وكنس برجليه الحسك والسماليل ومد الفراش ودن زين الصليلي اليا رفع شوفه وشاف الأزاويل من كل ديرة جاه عابر سبيلي تقل معه صكٍ مصدق على النيل شامل وراعي ملك ما هو وكيلي وجميع ما فوقه من أشجار ونخيل يبلش اليا طاح الثمر بالمشيلي لو ما تحت بيته من الخزن والكيل إلا بقايا كيس تمرٍ حويلي وألذّ من در البكار الأباهيل في محلبه ما هو حماضة صميلي بأرضٍ خلا ما دخلوها العماميل وسط الشبوك ولا استخفن جفيلي لهن مداهيل الجوازي مداهيل خضر الفياض اللي هواهن عليلي حيرانهن مع دربهن بالغماليل تضيع مع طول النصي والشتيلي عليك ياللي في وجيه المقابيل تضحك اليا دلهم حجاج البخيلي ضحكة فرح ما هي تصنع وتمثيل رمز الأصالة للعريب الأصيلي مجلسك مدهل للرجال المشاكيل يكض في سمحين الأخلاق ليلي على علومٍ صدق ما هي طهابيل معها دليل وللردى ما تميلي تشرح صدور مدوّرين التعاليل ويضيق منها صدر راع النقيلي وكيفٍ حماره في بطون الفناجيل خضاب عذراءٍ محربة للحليلي وصوانيٍ تملا من الحشو والحيل على الطلب تصميمها مستطيلي مبطي وأنا اسمع عنك بعض التفاصيل ولقيت فيك أكثر من اللي حكي لي أصلك عريب وذكرك أشهر من سهيل وسيرتك قدوة كل شهمٍ نبيلي طيبك شمل سكان ديرة هل الفيل لبّاسة العكفة دروع الدخيلي عقب الحرايب بينهم والمصاويل اللي تشعثر كل عظمٍ جليلي بأسباب قاعٍ ما لزرعه محاصيل قبس زند قبسونهم بالفتيلي وكلٍ يقول أنا عن البغي والميل بعد السماء مير البلاء من قبيلي حتى علي دوّر عليها مداخيل عجز وهو رجلٍ سياسي وحيلي عقب الهدير انحاش واستثفر الذيل وقعد عليهم بالمصايب يهيلي وقد عجزت قبله رجالٍ حلاحيل مير أنت يالهمّاش وجهك طويلي كللت جهدك يا أبيض الوجه تكليل ونجحت في حقن الدماء لا تسيلي واصلت جهدك يا بعيد المواصيل وعوّدت في نوماس وأجر وجميلي خلّيت بالجاه القلوب المغاليل مثل الثياب البيض عقب الغسيلي لك العكيمي وابن عثمان تجليل تنازلوا عن دم مية قتيلي وسبعين من غير النساء والجهاهيل اللي عليهم مال رمل النثيلي وكم واحدٍ فكيت راسه من الشيل يدهن له السيّاف حد الصقيلي لا يطعم العيشة ولا يمرح الليل بين العنابر يدرج بالشبيلي عليه سم أم العيون المظاليل طول الفراق ولا تبي له بديلي عيونها يمك تحرى المراسيل عيون بدوٍ للحياء تستخيلي من عقب مسح دموعها بالمناديل قلت أبشري يا أم خصرٍ نحيلي اليا تردى حمل زمل الجماميل ثوى بعضهم وامرحن بالمقيلي ما فيه غيرك يذكرونه اليا قيل وين أنت ياللي للعلايق تشيلي؟ لو ننخل عيال النساء بالمناخيل اللي نبا نلقاه مثلك قليلي قليل شكلك بالرياجيل بالحيل هذا إذا ما هو من المستحيلي وبكل جيلٍ للمراجل رياجيل يذكرهم التاريخ في كل جيلي عبدالكريم الشمري يعطي الخيل وأنته بوقتك تعطي آخر مديلي يا ما عطيت مطورٍ ما مشى ميل إلا من الميناء لحوش الوكيلي والجود ما فلّس رصيد الزناقيل والبخل ما تجر قليل الحصيلي قد قيل ما يطلع ربيعٍ بلا سيل ولا فيه سيل بلا خيالٍ ثقيلي ما ينبت الديرة رشاش الهماليل ولا تقطع الحفة مرقة الهزيلي والله ليبقى حي جيلٍ بعد جيل بيتٍ لمسلط يوم قالوا هبيلي قالوا هبيل؟ وقلت: شيخ المهابيل هبال طيب ولا صحاوة ذليلي بشديّد الهمّاش سقت التماثيل سوق الركايب مسرعات الشليلي حديتهن لين استقلن جواديل حدي المجوخ للحصان الأصيلي.

قصيدة الشاعر الكبير عضيب بن هليّل بن شلّاح العلوي، رحمه الله، في الشيخ محمد بن محسن بن صنيتان الفرم: مرحبا عداد ما تنشي مخيلة عد ما هلّت هماليل المخايل مرحبا حييت يا شيخ القبيلة يا عوضنا بالصناديد الأوايل فيك عن بعض البشر فرق ونفيلة يا زبون اللي عليه الوقت مايل نجل شيخٍ وإن علا فوق الأصيلة ما يوالونه هل السرد الأصايل في نهارٍ فيه طلعة واِتْحوِيلَة تالي الفرسان حمّاي الدبايل كان صيّاح الضحى شاح بشليله وفرّعن بيض الصبايا والحلايل خضّب السيف المسمّى من قَبِيله واشتهر في عزوته بين القبايل يا أبو فيصل لك فعولٍ مستحيلة لك عليّه يا ولد محسن فضايل والرجل يثبت كلامه من دليله وعن كلامي لازم أعطيك الدلايل بالعطاء يمناك مدتها جزيلة والله إنك ما تمد إلا الجلايل الشجاعة والكرم عند وسيلة والبشاشة فيك مع زين الخصايل اجتمعنا في مساعيك الجميلة وأنت من عادتك كسب الجمايل.

ملاحظة عندي على كلمة الشيخ اللي خذوها الناس دايم وسيلة الشيخ من ينطح وجيه المجاويخ شيخ الجهام اللي يقود القبيلة أيام سوقات العطف والمناويخ شيوخ القبايل ناطحين الثقيلة وإلا كريمٍ من خيار المطانيخ تلقى الضعيّف دايمٍ يلتجي له أو شيخ علمٍ له مكانه وتاريخ ويدعى على ما قيل صاحب فضيلة هذا حسب عرفي وأنا ماني الشيخ وكلٍ على ما قيل عقله دليله الشاعر الكبير عضيب بن هليّل العلوي رحمه الله.

ملوكٍ يفوق قياسهم كل مقياس وعمت مكارمهم شعوب ورعايا آل السعود اللي بهم عطف وإحساس ومن محكم الفرقان معهم وصايا الله يعز اللي للإسلام حراس اللي على التوحيد فيهم حمايا اللي لهم في قمة المجد مجلاس ورفرف علمهم فوق مدن وقرايا راياتهم تلفح على روس الأقواس رمز الجلالة فوق عال البنايا قيّادنا لا صار للحبل مسّاس وحنا بخدمتهم جنود وسرايا الشاعر الكبير بدر بن عواد الحويفي الحربي رحمه الله.

نمشي بأوامرهم وبالروح فادين أرواحنا دون الوطن مرخصينه حكام تحكم بالعدالة عظيمين وقادوا بنا على المسير السفينة إخوان نورة مأمنين الضعيفين هذاك من ذولاك متكفلينه يطوعون اللي عن الحق غاوين ومكرمين الشعب وموحدينه حماة الجزيرة عادلين الموازين في ظلهم كل الجزيرة حصينة. الشاعر الكبير لافي بن نفجان الشعبي الحربي.