ندى، ندى، ليمونادة

يا حبايب قلبي يا خبر، والله براحتكو خالص أنا مالي بجد. أنا عُمري منعت حد يعبر عن معتقده؟ عُمري أصلًا جيت كلمت أستاذ Dorcas هو ولا غيره؟ عُمري حتى حكمت على حد بيقول ده؟ أنا نص أصدقائي وكتير من مرضايا مش على ديني أو مش على دين أصلًا، ودي حاجة أصلًا لا تعنيني ولا تعنيهم نهائي! فين الإشكالية؟ وايه الصعب بجد في فهم الفرق بين إنك تقول رأيك في المطلق أو إنك تدخل تقوله كتعقيب على كلام شخصي حد بيقوله، ايه الفرق بين ده وبين الناس اللي بتكتب على بوست احتفال الكنيسة بالعيد "الحمد لله على نعمة الإسلام"؟ هو أنا صندوق الاقتراحات والشكاوي طيب؟ ثم أنا كمان مشكلتي مش مع ده، والله أي حد دخل اتكلم في بوستي الشخصي عن موقفه هو من الإسلام والرسول صلى الله عليه وسلم والله ما رديت عليه أصلًا، مع إنه شكله أهبل وجاي عندي أنا ليه هو أنا مالي؟ أنا ماعنديش مشكلة ما اللي عاوز يقول حاجة يقولها يا جماعة لا يعنيني نهائي، لكن مش من حق حد ييجي عند البوست بتاعي ويشتمني ويوصفني بالاختلال والجنون ويشيطنني ويزدري عقيدتي اللي ما حاولتش ولا عاوزاه يقتنع بيها أصلًا. هو ايه الصعب في ده؟ وايه الصعب في فهم إن مش حقي أروح أقول لحد ما طلبش رأيي ولا جه جنبي لا لا احنا هنتناقش معاك بالعافية وهنزدري اللي بتقوله ومش هنحترم مساحتك حتى وكمان هنشكك في قواك العقلية ومهنيتك وهنشتمك بأمك وأبوك، ولأ طبعا ده مش تطرف مننا وده مش أسلوب قمعي وإرهاب فكري ولا حاجة ده سف ههههههههه! يا حبيبي اعتقد براحتك من هنا لمليار سنة وقول كل اللي انت عاوزه في مساحتك بعيد عني خالص وبدون ما تناقشني في عقيدتي طالما أنا مش بتناقش، ولا تزدريها ولا توجهلي خطاب كراهية ولا أنا ليا أوجهلك حاجة غير كل خير. غير كده مش مقبول. بسيطة بجد. وربنا يسعدنا كلنا ويبعد عننا الإرهاب الفكري♥️