Mohamed 🦅

في ناس متعرفش تعيش غير تحت الكرباج.. وأول ما تديها برستيج، بتنسى أصلها!" ⚖️⚽ ■ فاكرين الموسم اللي فات في ماتش باريس، لما "آرني سلوت" قعّد محمد صلاح دكة، وخلاه يسخّن طول الماتش على الخط عشان ينزله الشوط التاني، وفي الآخر طنشّه ونزّل "إيزاك" اللي لسه راجع من إصابة ٣ شهور بداله؟! — ساعتها محدش نطق بنص كلمة، ولا لاعب قدر يبص في الأرض حتى، ولا إدارة اتدخلت.. عارفين ليه؟ عشان هناك فيه "مؤسسة" وعين حمرا وقانون بيمشي على التخين قبل الرفيع! ■ وعشان بس الناس الزيّاطة اللي بتصطاد في المية العكرة: الكلام ده مش تقليل من صلاح خالص، ده كلام في الأصول.. الفكرة كلها إن "القوي في اللي أقوى منه"، وافهمها زي ما تحب تفهمها! — الفرق بين اللي بيحصل دلوقتي واللي حصل زمان ٢٠ سنة بالتمام والكمال.. ٢٠ سنة كانت كفيلة إن الموازين تتشقلب والمبادئ تتباع في سوق الجمعة! — ارجع بذاكرتك ٢٠ سنة لورا (سنة ٢٠٠٦)، لما المعلم "حسن شحاتة. قرر يطلع "ميدو" – اللي كان وقتها نجم توتنهام الإنجليزي ومكسر الدنيا، عشان شايف ده الصح فنيًا، وميدو اعترض.. وقتها البلد كلها وقفت في ضهر المدرب، ولما الدنيا اتقلبت عشان يحلوا الأزمة، كان اللي الناس بتتحايل عليه عشان يصفى ويعفو هو المدرب مش اللاعيب... ■ لك أن تتخيل إن جمال وعلاء مبارك – وهم في عز جبروتهم وسلطتهم – ومعاهم سمير زاهر رئيس اتحاد الكورة، حاولوا يتوسطوا ويقنعوا حسن شحاتة إن ميدو يلعب النهائي.. والراجل قال "لأ" بملء الفم! واستبعده من النهائي ومن أي معسكر تاني للمنتخب، وكلمته هي اللي مشيت على الكل! — تعالى بقى شوف المشهد بعد ٢٠ سنة من الواقعة دي.. بتلاقي رئيس اتحاد الكورة المصري بنفسه بيسافر مخصوص للاعيب عشان يراضيه ويطبطب عليه ويقوله "معلش حقك عليا إن مدربك عمل تغيير وطلعك"، وتلاقي الإعلام طالع يبرر ويحلل في أهمية التغيير وكأن المدرب ارتكب جريمة في حق الإنسانية لما استخدم حقه الفني! 🚨أنا هنا مش داخل في جدال مين السبب في إقالة حسام حسن، لأن دي قصة تانية تتسأل لصاحب القرار.. لكن اللي واجعني بجد هو قيمة الأشياء ومعناها اللي راحت مننا. - إزاي في ٢٠ سنة بس اتحولنا من منظومة بتقدّس الكبير وبتحترم هيبة تيشيرت البلد، لمنظومة بتترعب من النجم وبتشتري خاطره على حساب كرامة المدرب والمنتخب؟! إيه اللي حصل في الـ ٢٠ سنة دول خلّانا نتحول لمسخ، ونرخص مبادئنا للدرجة دي؟!

لقد احسن محمد صلاح لحسام حسن دون أن يدري حسام كان قد فقد اغلب شعبيته بعد احداثه الشخصية وقصة الشناوي صلاح ببوست اخراج اللسان واظهار الشماته أعاد جزء كبير من تعاطف الكثيرين مع حسام وأصبح له مريدين يرونه مظلوماً وتعرض لمؤامرة ونسوا افعاله الصبيانية فرب ضاره نافعة يا صلاح