⚠️ تصحيح بسيط وبنفس الوقت مهم .. شفت هذي الصورة بالتايم لاين، وبشكل عام فكرتها رائعة، وتوضح بعض انواع تقنية الـ FSR 4.1 ولكن فيها مشكلتين: الأولى: انها ناقصة (في حال أردنا الشمولية). لأن النسخة المخففة الفعلية "للاجهزة المحمولة مثل XBOX Ally" ليست موجودة الثانية: ان معمارية PS5 Pro ليست RDNA 3. بل هي لا تزال مبنية على RDNA 2 كهيكل اساسي، او هندسة اساسية، مضافاً عليها بعض الميزات المتقدمة. وللعلم: الصورة ليست رسمية، لاني بحثت عن مصدرها وماكان رسمي. ولكني متشوق للنتايج اللي بنشوفها قدام بالنسبة لدعمها في الكونسول ولي تعليق لاحق

اعلانات مبكرة؟ بتواريخ اصدار محددة 📆 ولكنها بعيدة جداً - 2029 و 2030!! 📝 بكتب وجهة نظري بالموضوع: كلنا شفنا اعلانات مفاجئة لكل من Diablo 5 و StarCraft الجديدة، وكانت عروض في مراحل مبكرة حسب الواضح .. ولكن الامر الغريب هو انهم حددوا معها تواريخ اصدار او مواعيد اصدار بعيدة (2029 و 2030)، واعتقد ان كلنا نشوف ان هذا الامر غريب، او حتى شيء ما نحبه 🤔 وشخصياً لو تسألني؟ انا ما احب فكرة الاعلان عن مشروع وانتظره سنين وبدون أي تفاصيل او تاريخ اصدار (نعم TES VI و Metroid Prime 4 وو ..الخ) لأن الواحد طبيعي بيسأل ويقول ليش تعلن عن مشروع بمرحلة مبكرة، وتتركني سنوات انتظر منك معلومة؟ وبالذات اذا "ما حددت تاريخ اصدار" ... هي يمكن تكون جزء من خطة تسويقية انقاذية للشركات عشان تطمن الجماهير وانا اتفهم هذا .. لكني ما افضله على الصعيد الشخصي وبصراحة على حسب الحالة لأنهم متفاوتين جداً 🔴 بس فيه شيء مختلف هنا، وهذا هو مربط الفرس: 1- وجود اعلان مبكر 2- وجود تاريخ اصدار (بعيد) وغالباًلو نرجع بالزمن، نشوف ان هذول الاثنين ما يجتمعون مع بعض. فما نشوف اعلان مبكر للعبة يجتمع معه اعلان الوقت المجدول لصدورها ويكون مثلاً بعد 4 سنوات بهذي الطريقة .. وهذا اللي يخلي الموضوع مختلف شوي وشعرت كأنه شيء متعمد؟ وقلت ليش يسوون كذا وما تعلموا بعض الدروس؟ 🔸بتحليل بسيط، اعتقد انهم عملوا كذا كجزء من التوجه الجديد حق XBOX في انهم يبغون "يركزون على الأسماء الكبيرة" ضمن حملة عودة اكس بوكس او Return of XBOX ... وجزء منها شفناه بالفعل في الاعلانات المبكرة لسلسلة Fallout اللي جات بطريقة وكأنها مثل وضع الأساسات وتسجيل الحظور لتطمين الجمهور على وجود مشاريع متعددة قادمة بالطريق من "نفس العنوان" يعني بالمختصر: [رسم خارطة الطريق] 🤔 بتقولي مشاريع Fallout مالها تواريخ اصدار، بقولك صح .. رغم ان بعضها اصلا معروف او متسرب ولكن الفكرة كانت في انهم متعمدين يعلنون مجموعة مشاريع (4 العاب) دفعة واحدة بشكل مبكر ... عشان يثبتون جديتهم للجماهير في التركيز على الأسماء الكبيرة والحين نفس الأمر نشوفه من Blizzard، ولكن الفارق هو ان Blizzard نقدر نقول كانوا اكثر دقة من Bethesda في تحديد المواعيد المتوقعة (ولو انها بعيدة) 🔸 لذلك انا اشوف انهم سارعوا بالإعلان عن مشاريع جديدة لأكبر الأسماء من Blizzard لتطمين الجمهور، وتوضيح خارطة الطريق لهم، بدلاً من ترك الساحة في وضع مجهول وضبابي .. لا سيما ان Blizzard شبه غايبين عن الساحة والجمهور مستغرب وينتظر ... وهذي الاعلانات بحد ذاتها بتقوي حملة Return of XBOX وتعطي صيت وهايب مبكر للجيل الجاي ------------ 🔴 ارجع اقول بشكل عام: فكرة الاعلان عن مشروع وهو في مراحل مبكرة وبدون تحديد موعد إصدار ونصبر عليه سنين، هي فكرة غير جيدة ... ويمكن اغلبنا يتفق بهذي النقطة مثلما شفنا في اعلانات لالعاب كثيرة صار معها نفس الشيء ⚠️ ولكن مثلما قلت ان المختلف هنا هو اجتماع الامرين: اعلان مبكر + تحديد مواعيد الاطلاق رغم أن التواريخ بعيدة جداً (2029 & 2030) ولكنها معلومة ومعروفة تقريباً.. وهذا الأمر انا اشوفه متعمد تحت مظلة او حملة: عودة اكس بوكس بالنهاية اتوقع بنشوف المزيد من الاستديوهات تعلن عن مشاريع مستقبلية بنفس هذي الطريقة والله اعلم رأيكم؟

📝 رأيي الشخصي: "مابين قرار Playstation وسلوك XBOX" يوجد تباين واضح، وفارق جوهري في التعامل مع موضوع نسخ الاقراص بين الاثنين من كان الافضل؟ الإجابة سهلة وواضحة للجميع وهو فريق XBOX. ولكن بعلق على الموضوع بشكل واسع: 🔵 اولاً: المشكلة اللي نشوفها الحين هي ان Playstation اصابها جنون العظمة، وفعلاً الشركة متعودة على تطبيق قراراتها مع ضمانها لوجود مؤيدين دائمين لها مهما عَلَت أصوات القِلّة المعارضين ... ولكن هذي المرة كان قرارهم جريء جداً ومتهور (او نقول مستعجل جداً)، وكان صعب وثقيل على نفوس اللاعبين. وحتى المؤيد لهم ما اكل عيش ويمكن وجد نفسه في موقف سيء او سخيف امام انظار اللاعبين وهو يحاول يبرر بينما من جهة اخرى كثيرين كانوا عقلانيين وفكروا فيها واقعياً وحاولوا يتفهمون ليش الناس زعلانين حتى لو هم مكتبتهم معظمها رقمية (مثلي انا) لأنهم فهموا شعورهم وربما يملكون بعض الالعاب الفيزيائية ويتمنوا لو يقدرون يشغلونها مستقبلاً على الكونسول الجديد 🔸 والاشكالية الفعلية هي ان ادارة Playstation طيحوا انفسهم في موقف يتمناه اي منافس لهم في الساحة عشان يستغله، رغم انه ما هو بالشيء البسيط انك تغير خططك في يوم وليلة. خصوصاً في قرارات كبيرة زي هذي ... 🟢 ومن جهة اخرى اشوف XBOX اتخذوا نهج مختلف تماماً في طريقة التعامل مع موضوع الاقراص (وهو افضل بكثير)، واللاعبين اعتبروا خطوة XBOX ضربة معلم في الرد على هذا الموقف من Playstation ويمكن نشوف ان Microsoft لحد الحين ما ردوا بشكل مباشر او بالطريقة العنيفة والصريحة اللي ممكن تجي في بال الكثير ويقولون: [هذي فرصتكم تجلدونهم وتعلنوا عن دعم الاقراص بشكل رسمي] 🔸 وفعلياً؟ صحيح هي جات على طبق من ذهب لـ XBOX اذا نظرنا لها بتمعن .. فبالامكان بسهولة يردون الصاع بصاعين بالذات في قضية مثل هذي. لأننا لو نرجع بالزمن إلى الخلف، بنشوف ان XBOX اصلا انجلدوا من Playstation في قصية مشابهة جداً لهذي في 2013 (فيديو يوشيدا المعروف) ⚠️ بس الموضوع مو بالبساطة هذي اننا نجي نقول ليش ما تعلن Microsoft او XBOX عن دعم الاقراص في الكونسول القادم رسمياً وتفوز؟ 🤔 لأن اللي نشوفه هو: ان XBOX حتى لو انهم مجهزين انفسهم للسوق الرقمي من فترة طويلة (حرفياً العابهم وباندلاتهم اساساً من زمااااااان تركز على الرقمي في معظم الاسواق) إلّا انهم عملوا حركة تخلي اللاعبين يشوفونها احترام لهم ✅ ... وخصوصاً انها جات بتوقيت مثالي بعد غضب اللاعبين من Playstation وفعلاً انا اشوفه امر حقيقي .. وفيه احترام كبير للاعب، واعطاءه الفرصة والوقت والتمهيد عشان يتجهز للانتقال الى السوق الرقمي + يحتفظ بحقه بالكامل في العابه الملموسة، او الاقراص اللي يملكها، وتبقى التراخيص معه دائماً ✅ صحيح، واتفق مع اللي يقول مافي اعلان رسمي مباشر على ان كونسول XBOX القادم بيدعم نسخ الاقراص. ولكن برضو لا يوجد اعلان رسمي على "ايقاف تصنيع الاقراص" كما فعلت SONY .. وهذا هو الفرق الجوهري 🤔 ⚠️ لكن حتى لو حصل، وقرروا Microsoft عدم دعم الاقراص في الجيل القادم من XBOX إلا انه يبقى متوفر للاعب امور وخيارات كثيرة: 1- دعم التوافق المسبق لالعابه ✅ 2- ودعم خدمة تحويل القرص الى نسخة رقمية ويبقى القرص معه للابد ولا ينتهي ويقدر من اي كونسول قديم عنده يحول العابه ✅ 3- دعم Play Anywhere لو كان بيغير إلى PC وبيحصل العابه كنسخ رقمية بالمكتبة وببلاش بدون ما يضطر يشتريهم من جديد ✅ 4- دعم الحفظ المشترك والموحد ✅ وغيره من التسهيلات فالفارق لا زال كبير وجوهري بين التوجهين في خدمة اللاعب وتجهيزه، واعطاءه الوقت والفرصة لحفظ حقه، والانتقال بسلاسة ومعه كامل مكتبة العابه. ❓ فهل هذا الشيء بيكون نقطة تنافسية مهمة للجيل القادم؟ ... الاجابة نعم و لا نعم: اذا استفادت منه Microsoft كنقطة اساسية وجوهرية تسوق لها في الجيل القادم. واستفادوا من الزخم وتسهيل الأمر للاعبين وتسويق الميزة بكل مكان لا: اذا تعاملوا مع الموضوع بتواضع وبدون جرأة. ولو Sony عملت شيء مختلف ومفاجئ