ديّسمبر

كل يوم بكتب تحت هذي التغريده دعوات مالها الا باب الكريم .

احب هالكلام احسه يقرا على قلبي المعوذات .

يعني مافي شي بيدك تسوينه يا ديسمبر ولا في شي يستاهل هالاستنفار كله ! الموضوع يبي له شاي وركعتين وترك التدخل في شؤون الغيب لا اكثر .

تعبانه مالي نفس ادخل تويتر اليوم المعذره من الجميع .

عسى ربي يرزقنا قلبٍ ما يستوحش من تقلبات الايام يعرف ان تدبير الله احن عليه من تدبيره لنفسه وان اللي عند الله اجمل من كل اللي رسمه بخياله .

الله يشفيك ويعافيك يا عبد الحميد الشراري ، ادعو له بالشفاء العاجل .

لو يدري العبد وش كثر ربه لطيف به ما خاف من بكره ولا شال هم اقداره .

صباحووو احس اني في وئام مع الحياه بشكل عجييييب مافي شي مستعجلني ولا شي شايل همه قلبي يازين الانسان وهو بخير من داخله .

من قالكم ان الرياض بيصيبها شي ؟ هذي الرياض في حفظ الله واللي استودعناه عند ارحم الراحمين ماضاع عسى ربي يظلل سماها بالامان ويكتب لاهلها الطمأنينه ولا يمر على ديارها الا كل خير وسعو صدوركم .

عطوني رايكم ابدأ اسوي غرفتي وخلصها قبل رمضان او اسوي بطانيه للشتا ؟

لي سنه سارقه فروة اخوي وصارت في حكم الممتلكات الشخصيه عندي رغم مقاسها اللي يفوقني والآن انتظر يشتري له فروه عشان اقدر اطلع فروته والبسها على وضح النقا .

عاد تدرون انا عماتي ماكانو عمات عشان كذا احس اني ابي اعوض هالشعور في عيال اخواني واكون لهم العمه اللي تنحب ابيهم يكبرون وهم مايعرفون عن العمه الا الحنيه والدلال ويكون لهم فيني خاطر مايرد ولا ينكسر اذكر اني اتخذت هذا العهد على نفسي و والله لو يطلبون حشاشة روحي ماعزّت عليهم هذولا مايهونون علي بشي❣️.

فكرة إني عمة لبنات أخوي هذي من المناصب اللي أشوف إني متميّزة فيها بالفطرة والآن صرت عمه لولد ولأول مره وننتظر وش بتضيف هالتجربه لمسيرتي في العمومه الله يعين احسها مسؤوليه عظيمه على عاتقي والآن ابي التعليقات كلها مبروك وفخر واعتراف بتميزي في هالمجال لااحد يبخل علي بشي ترا ادخال السرور على قلب المسلم من احب الاعمال الى الله 🤨.

تدري ان دعواتك تستجاب لما تكون الناس غافله❗️ يعني جوف الليل والناس غرقانه بنومها او وقت انشغالهم بالدنيا والاسواق هذي اوقات اغتنموها بالدعاء والذكر لانك يوم تختار طاعة الله والناس منشغله عنه فهذا من صدق الاخلاص ومحبة القرب منه .

اكتشفت ان عندي قدره عجيبه على تحويل ابسط الامور الى قضية رأي عام داخل راسي افكر واحلل واراجع واستنتج وارجع لنقطة البداااااايه وبالنهايه اكتشف ان الموضوع مايستاهل حتى ارفع له حاجب الله يقلع هالاجتهاد اللي في غير محله والله ان النفس ملعونة ثوا .

والله ان من حق النفس عليك انك ما تكون خصمها في كل مره ان ضاقت وسعت عليها وان اخطأت علمتها وان تعبت خليتها ترتاح عسى الله يرزقنا الرفق اللي يخلي الواحد مأمناً لنفسه لا عبئاً عليها .

ادخل في حالة عدم استقرار نفسي ومناخي اذا ما بدأ صباحي بعريكه يعني شلون تبون البني آدم يواجه الحياه وهو فاقد اهم مقومات الاستقرار ماني فاهمه ؟؟

يارب تجي بشايرك على قلبي متتابعه لين ماعاد اعرف اي نعمه ابدأ بحمدك عليها .