P A P I

Leo Ikulu, jijini Dar es Salaam, nimemkaribisha na kufanya mazungumzo na Rais wa Jamhuri ya Angola, Mheshimiwa João Lourenço, aliyeko nchini kwa ziara ya Kitaifa, ikiwa ni ziara ya kwanza ya Rais wa Angola nchini Tanzania katika kipindi cha miaka 45. Katika mazungumzo yetu tumejadili juu ya kuimarisha uhusiano wa kihistoria uliojengwa na waasisi wa mataifa yetu, Hayati Mwalimu Julius Nyerere na Hayati Agostinho Neto. Tumekubaliana kuimarisha ushirikiano wa kiuchumi na kibiashara kwa Tanzania kufungua upya ubalozi wake nchini Angola, kuandaa kongamano la biashara na uwekezaji, kuunganisha Ushoroba wa Lobito na Dar es Salaam, na kuboresha muunganiko wa nchi zetu kwa usafiri wa anga na majini. Pia, tumejadili fursa za uwekezaji katika sekta ya mafuta nchini Angola pamoja na kuimarisha ushirikiano wa madini, ikiwemo kutumia Kituo cha Madini Afrika kilichopo Dar es Salaam kuongeza thamani ya rasilimali hizo. Aidha, kama Kinara wa Afya ya Mama na Mtoto, nimemwalika Rais Lourenço kuungana nami katika juhudi za kutokomeza vifo vya mama na watoto, na kuhakikisha kila mtoto anapata chanjo zinazostahili.