Pp

قبل تقول لأحد يا كسول.. إلتزامك بالتمارين والحركة وغيرها من العادات الإيجابية هي توفيق من الله سبحانه وتعالى، ونعمة عظيمة مو دليل إنك أفضل من غيرك. تظن الكسول ما يدري إنه كسول؟ يدري ويلوم نفسه كل يوم أكثر منك. تظن كل تأجيل وتسويف سببه ضعف إرادة؟ فيه تعب ماتشوفه وضغوطات نفسيه وهرمونات وهموم ماتدري عنها ويمكن أنت تعيشها بس ربي وفقك وما سيطرت عليك. تظن كل الناس زي ظروفك؟ فيه أم ما تنام وفيه واحد يصرف على عايلتين وفيه وحدة ما يخلونها تطلع من البيت. تظن كل الناس بصحتك؟ فيه واحد يحارب الألم ويتمرن وهو يتألم وفيه واحد مجرد قيامه اليوم من السرير يعتبر إنجاز. كلمة كسول عمرها ما حركت أحد. اللي يحرك تفهم، ومعلومة صحيحة وطريقة يطبقها على وضعه هو مو على وضعك أنت. إذا تبي تفيد إنسان علمه، لا تحكم عليه. وكونك مدرب خصوصا لابد أن تتفهم الجانب النفسي لدى الناس اللي تتعامل معهم.