RAYAN 🇱🇧✨

أهلاً وسهلاً بفخامة الرئيس جوزاف عون في طرابلس، عاصمة لبنان الثانية، وأفقر مدينة على حوض البحر الأبيض المتوسط، نتيجة عقود من سياساتكم وسياسات يلي سبقوكم. تغيّرت الوجوه والكراسي، بس الفقر والتهميش والإهمال بقوا. بعد ١٢ سنة على زيارة الرئيس ميشال سليمان لطرابلس، بتعود الرئاسة إلى عاصمة الشمال. وكنّا نتمنّى تكون هالعودة محمّلة بأفعال، مش بس مواكب وصور واستقبالات. كنّا نتمنّى نشوف حصر السلاح بإيد الدولة، واسترجاع أموال المودعين، ومحاسبة زعران السياسيين يلي اليوم عم يتسابقوا على استقبالك والتصفيق إلك، وتنفيذ ولو ١٠٪ من خطاب القسم. وكنّا نتمنّى تستقبلك طرابلس من دون جبل النفايات يلي صار أفخم معلم سياحي بعهد الإهمال، ومن دون شباب عاطل عن العمل وأحياء محرومة من أبسط حقوقها، بمدينة عندها مرفأ ومصفاة ومقوّمات اقتصادية، بس أهلها محرومون من فرص العمل والعيش الكريم. وكنّا نتمنّى يكون بأوائل مستقبليك الموقوفون الإسلاميون وعائلاتهم، يلي بيطالبوا بالعدالة وإنهاء المظلومية والتوقيف التعسّفي. فخامة الرئيس، طرابلس ما فقرتها قلّة الإمكانيات، فقّرتها عقود من السياسات والصفقات والإهمال، وصارت تُذكر بالانتخابات وتُكتشف عند الزيارات. أهلاً بفخامتك بين أهلك، بس طرابلس ما بدها شفقة ولا وعود جديدة؛ بدها دولة تحاسب، وسلاح بإيدها وحدها، وحقوق ترجع لأصحابها، وفرص عمل لشبابها، وعدالة ترفع عنها الحرمان. بعد ١٢ سنة، طرابلس ما بدها رئيس يزورها وبس؛ بدها دولة تتذكّرها بعد ما يفلّ الموكب، مش بس وقت الاستقبالات والصور. @LBpresidency