B Shivashanth Reddy™

నెల రోజులైనా ధాన్యం కొనుగోళ్లు ప్రారంభం కాలేదు – రైతులను గాలికి వదిలేసిన కాంగ్రెస్ ప్రభుత్వం! అకాల వర్షాలతో రైతులకు తీవ్ర నష్టం – బీజేపీ జిల్లా అధ్యక్షులు డాక్టర్ నాగం వర్షిత్ రెడ్డి నల్గొండ జిల్లాలో ధాన్యం కొనుగోలు కేంద్రాలకు రైతులు పంట తీసుకొచ్చి నెల రోజులు గడుస్తున్నా పూర్తిస్థాయిలో కాంటాలు వేయకపోవడం, కొనుగోలు చేసిన ధాన్యాన్ని మిల్లులకు తరలించకపోవడం కాంగ్రెస్ ప్రభుత్వ నిర్లక్ష్యానికి నిదర్శనమని బీజేపీ జిల్లా అధ్యక్షులు డాక్టర్ నాగం వర్షిత్ రెడ్డి విమర్శించారు. ఎన్నో కష్టనష్టాలు ఎదుర్కొని పండించిన పంటను అమ్ముకోవడానికి రైతులు కొనుగోలు కేంద్రాల వద్ద రోజుల తరబడి ఎదురుచూస్తున్నారని, మరోవైపు అకాల వర్షాలతో ధాన్యం తడిసి తీవ్రంగా నష్టపోతున్నారని ఆవేదన వ్యక్తం చేశారు. ఖరీఫ్ సీజన్‌కు ముందే అవసరమైన ప్రణాళికలు రూపొందించడంలో ప్రభుత్వం, అధికారులు పూర్తిగా విఫలమయ్యారని మండిపడ్డారు. నల్గొండ జిల్లాకు మంత్రి కోమటిరెడ్డి వెంకట్‌రెడ్డి శాపంగా మారారని విమర్శిస్తూ, కొనుగోలు కేంద్రాలను ప్రారంభించడమే కాకుండా వెంటనే కాంటాలు వేసి ధాన్యాన్ని మిల్లులకు తరలించే బాధ్యతను ప్రభుత్వం తీసుకోవాలని డిమాండ్ చేశారు. జిల్లా కలెక్టర్ వెంటనే స్పందించి కొనుగోలు కేంద్రాల్లో కాంటాలు, గన్నీ సంచులు, హమాలీలు, రవాణా వాహనాలు అందుబాటులో ఉంచాలని, వర్షాల నుంచి ధాన్యాన్ని కాపాడేందుకు టార్పాలిన్లు ఏర్పాటు చేయాలని కోరారు. తడిసిన ధాన్యం వల్ల రైతులకు నష్టం కలగకుండా తగిన చర్యలు తీసుకోవాలని విజ్ఞప్తి చేశారు. రైతులను ఆదుకోవాల్సిన సమయంలో రాజకీయాలు కాదు.. బాధ్యత ముఖ్యం. ఇప్పటికైనా ప్రభుత్వం స్పందించి యుద్ధ ప్రాతిపదికన ధాన్యం కొనుగోళ్లు, కాంటాలు, తరలింపు ప్రక్రియ పూర్తి చేయాలని డిమాండ్ చేశారు. లేనిపక్షంలో రైతుల పక్షాన బీజేపీ ప్రజా ఉద్యమాలకు సిద్ధమవుతుందని డాక్టర్ నాగం వర్షిత్ రెడ్డి హెచ్చరించారు. ఈ కార్యక్రమంలో జిల్లా ప్రధాన కార్యదర్శి పోతేపాక లింగస్వామి, బీజేపీ నాయకులు వంగూరి రాఖీ, పాలకూరి రవిగౌడ్, మంగలిపల్లి కిషన్ తదితరులు పాల్గొన్నారు.