Дэлхийн улс орнуудын "Аз жаргалын индекс" гэж байдаг. Энэ жагсаалтыг Финланд Улс тэргүүлдэг. 2025 оны тайлангаар Монгол Улс энэ жагсаалтанд орсон 150 орчим улсаас 77-д жагсаж байна. Уг индексийг тооцохдоо зөвхөн эдийн засаг бус нийгмийн дэд бүтэц, амьдралын чанар, чөлөөт сонголт хийх эрх чөлөө, авлига, энэрэнгүй өглөгч чанар гэх зэрэг 6 үндсэн үзүүлэлтийг ашигладаг. Дэлхийн улс орнуудын аз жаргалын индексийн дундаж нь 5.57 байдаг бол Финландынх нь дунджаас дээш буюу 7.74 харин сүүл мушгиж буй Афганистан улсын 1.36, Монгол Улсынх 5.83 байна. Аз жаргалтай гэхээр баяр баясгалантай байнга инээж хөхрөөд явахын нэр биш бөгөөд Финланд улсын аз жаргалын суурь нь итгэлцэл, тэр дундаа ард иргэд болон төр хоорондын итгэлцэл гэж нутгийн иргэн өгүүлж байв. Ийм итгэлцэл байгаа учраас бид авлигад санаа зовдоггүй, ийм итгэлцэл байдаг учраас төр сонгогчдоос асуухгүйгээр нийгмийн дэд бүтцэд хөрөнгө оруулдаг, ийм итгэлцэл байдаг учраас татвар төлөгчид чөлөөт сонголтоо хийх эрх чөлөөгөө эдэлж чаддаг, ийм итгэлцэл оршиж байна гэмээнэ амьдралын чанар, стандартаа хангаж барьж чаддаг, ийм итгэлцэлгүй бол өгөөмөр, нинжин сэтгэл, энэрэнгүй үйлдэл гарахгүй боломжгүй гэнэ ээ. Финландын Ерөнхийлөгч Александр Стубб өөрөө Европын холбооны уян хатан чанар, интеграцийн чиглэлээр судалгаа хийн докторын зэргээ хамгаалсан хүн бөгөөд Европын холбооны бодлогод нөлөөтэй, тэр бүү хэл Европын холбоог тэргүүлэх өндөр магадлалтай лидерээр нэрлэгдэж буй. Өчигдөрхөн дайныг зогсоох талаар Путинтэй утсаар ярьж байна билээ. Өмнөх Ерөнхий сайд болох Санна Марин хамгийн залуудаа буюу 34 насандаа засгаа тэргүүлсэн эмэгтэй болж түүхэнд үлдсэн. Цар тахлын үеийн ухаалаг удирдлага болон улсаа НАТО-д элсүүлж чадсан гавъяатай. Найзынхаа төрсөн өдрийн үдэшлэг дээр бүжиж буй бичлэг нь задарч олон нийтээс шүүмжлэл авсан ч тэр нь улс төрөөс гарах шалтгаан болоогүй. Одоогийн Ерөнхий сайд нь эсрэг намынх хэдий ч хувийн түвшинд энэ хоёр маш сайн, ажил хэргийн дотно харилцаа байдаг гэнэ