رحت من كم سنة احدى الوزارات اخلص معاملة. توقيع ورى توقيع ورى توقيع، آخر شي قالوا لي لازم تدخل على المدير يوقع لك وتخلص المعامله دخلت على المدير سلمت عليه، والله اني ما شفت بحياتي شخص شايف روحه و منفس مثل هالمدير. منزل راسه و يدخن سيجارة وما رد على السلام قال لي شنو معاملتك ؟ قلت له تفضل قالي اسألك شنو معاملتك ؟ (بنزره) قلت له هذي المعامله اخوي جدامك وشرحت له قال لي انطر بره شوي أناديك و يلطعني نص ساعه، ناس داخله طالعه وانا ناطر. ابي اشتكي عليه، ماكو احد اشتكي له على سوء تصرفاته معاي كاني عدو. اليوم ندخل الوزارات وراسنا مرفوع، ندري ان ورانا ظهر وفي شخص اسمه الشيخ فهد اليوسف ياخذ حقنا من اي شخص يتطاول علينا او يقصر بعمله او حتى يرفض ان يقابلنا. الكل محترم نفسه والكل يداوم والكل خايف من المحاسبه والكل يشتغل والكل ينجز المعاملات والاستقبال سبحان مغير الاحوال اغلبهم مبتسمين وبشوشين ويركضون يسوون لك معاملتك. شكرا لصاحب السمو الشيخ مشعل الاحمد الصباح عسى الله يطول بعمرك ويعطيك الصحة والعافية

منظر يضيق الخلق ويحز بالخاطر. للمرة الثانية أصادف هالمنظر رجال كبير بالعمر واقف على جانب الدائري الخامس، تكرمون، يقضي حاجته. الشوارع زحمة، وكل إنسان له ظروفه، ومع الأسف، مافي حمامات بالطرق السريعة و الحمامات العامة قليلة، والموجود منها في كثير من الأماكن حالتهم بالويل. وحتى حمامات محطات البنزين تضيّق الخلق وكذلك حدايق المناطق مهمله . الحمامات العامة النظيفة ماهي رفاهية، بل من أساسيات أي دولة متطوره. اليوم في حمامات ذكية تنظف وتعقم نفسها آليًا وما تحتاج إلى وجود موظف بشكل دائم. ليش ما يتم تركيبها في الطرق السريعة، وحتى المدارس حماماتها مكسرة. ركّبوا حمامات ذاتية التنظيف والتعقيم في كل مكان، هذا من الأولويات، مو من الكماليات