Ebrahim Al mannai.🇧🇭

في فيلا المنصورية، والعالم كله برّه البيت، عادل إمام قاعد في مكتبه. دخلت عليه سارة، بنته الوحيدة، ووشها محمر، وصوتها واطي. «بابا… عايزة أتكلم معاك في موضوع.» الزعيم رفع عينيه من الورق اللي قدامه، وبص لها بابتسامة خفيفة: «خير يا سارة؟» قالت بهدوء، كإنها بتقول حاجة عادية: «أحمد… زميلي في الجامعة… عايز يقابلك.» الجامعة الأمريكية، كلية الإعلام. عادل سألها: «أحمد مين؟» «أحمد نبيل مقبل.» الاسم وقع في ودانه غريب. مش غريب أوي، بس مش مريح. قام حضنها، وقالها كلام الأب اللي بيفرح ببنته وهي على وش جواز. اتفقوا على ميعاد. لكن لما سارة خرجت، الاسم فضل يدور في دماغه. سأل. عرف. نبيل مقبل، المليونير الإخواني، واحد من كبار رجالة الجماعة في الجيزة، وخزنة فلوسهم. السعادة اتغيرت. بقى فيه قلق. عادل قعد مع بنته، كلّمها بصراحة. قالتله: «أحمد مش إخوان… وباباه ساب الجماعة.» كان باين إنها بتحبه أوي. وما قدرش يكسر قلبها. طلب من رامي ومحمد يقابلوا أحمد ويصاحبوه. عايز يعرف الشاب ده يستاهل أخته ولا لأ. في الميعاد، جه نبيل مقبل ومعاه ابنه. قعدوا قدام الزعيم. نبيل اتكلم بهدوء: «أستاذ عادل، في حاجات قدرية… أنا إخوان من وأنا عندي 19 سنة، وماليش علاقة بالسياسة.» عادل بص له وقال: «وأنا كنت عضو في حزب العمال والفلاحين الشيوعي المصري وأنا عندي 16 سنة… نقرا الفاتحة؟» نبيل ردّ: «نقرا الفاتحة.» قروا الفاتحة. مباركة مرشد الإخوان وقتها مأمون الهضيبي قبل ما يموت. واتحدد ميعاد عقد القران في مشيخة الأزهر. أول مرة عادل إمام يدخل المشيخة. معاه مراته هالة الشلقاني، وسارة، وإخواتها. وبعد دقايق، المفاجأة: مرشد الإخوان محمد مهدي عاكف بنفسه جاي يبارك. الزعيم قاعد جنب مرشد «طيور الظلام»، وبعدين خدوه بالحضن. شيخ الأزهر محمد سيد طنطاوي هو اللي عقد القران. عادل اشترط الفرح في فيلته. بعت دعوات للرئيس مبارك وولاده جمال وعلاء. العلاقة كانت قوية، لكن الرئيس مبارك رفض. قال: «معقول عادل يعمل كده… يدي بنته لدول؟ ده أكتر واحد عارفهم وحاربهم!» ومنع ولاده يروحوا. تعليمات لرئيس الوزراء عاطف عبيد إنه ميروحش، ولا حد من الكبار، عشان محدش يفهم إن الدولة والجماعة بيتصالحوا. اللي راح من الوزراء تلاتة مش معروفين. صفوت الشريف وزكريا عزمي بعتوا بوكيهات ورد بس. الفرح كلف حوالي 350 ألف دولار. عادل منع المشروبات الروحية مراعاة لنسيبه. دينا الراقصة اتصلت تباركله، وقالتله إنها جايبة فستان مخصوص ترقص بيه. قالها: «ملوش لزوم يا دينا… كفاية مجيتك.» راحت، وما رقصتش. العيلة كانت متضادة: أسرة عادل لابسين سواريه، وعيلة العريس محتشمين. شيرين وعامر منيب وريكو غنوا، محدش اتفاعل أوي. بعد الفرح، الصحافة هاجمت. «عادل إمام سلّم بنته لطيور الظلام.» قالوا إن الإخوان وافقوا عشان يخبوا فلوسهم ورا اسمه وشهرته. عادل ما ردش، كإنه ما سمعش. وبعد ثلاث سنين، في 2007، الشرطة اقتحمت بيت نبيل مقبل في الدقي. قبضوا على قيادات الإخوان اللي كانوا مجتمعين هناك، منهم عصام العريان ومحمود حسين، ونبيل نفسه اتاخد. كانوا بيتكلموا في تحرك الجماعة واستغلال الأوضاع. وفي نفس الاجتماع، قرروا إن كل عضو يخصص نسبة من مرتبه للتنظيم عشان يقدروا يستولوا على السلطة… السلطة اللي عادل كان من كبار مؤيديها. القصة خلصت كده. مصاهرة غريبة، بين الزعيم اللي حارب «طيور الظلام» في أفلامه، وبين قيادة من قياداتهم. واللي حصل بعد كده، كل واحد يفسره على مزاجه.