مراجعة وولفرين | متعة القتال ما كانت كافية عشان تكتمل التجربة. بعد ما أنهيت Marvel’s Wolverine، طلعت بانطباع مختلط: استمتعت فيها، وأشوف بعض الانتقادات كانت مبالغًا فيها، لكن عندها مشاكل فعلية أثّرت على التجربة. هذا رأيي بالتفصيل، بدون حرق: ١) إحساس وولفرين أكثر شيء نجحت فيه اللعبة هو إنها تعطيني إحساس إني ألعب بوولفرين فعلًا. القيمبلاي رائع والقتالات حماسية، وفي لحظات كثيرة حسّيت بشراسته وعصبيته وغرائزه. هالجانب كان من أبرز أسباب استمتاعي باللعبة. ٢) تفاصيل ما بعد القتال شكل جسم وولفرين وبدلته بعد المواجهات من التفاصيل اللي أعجبتني. آثار المعارك تعطي إحساس بقوتها، وتخلي مظهره يعكس اللي مر فيه. توجه جريء من إنسومنياك، وأشوفه مناسب للشخصية وطبيعتها. ٣) المتعة يصاحبها تكرار مع إعجابي بالقتال، التكرار كان واضحًا. تمنيت تنوعًا أكبر في المواجهات، خصوصًا مع قلة الأعداء البشر والتركيز الكبير على الروبوتات. القتال ممتع، لكن تكرار المواجهات قلّل من حماسي له مع الوقت. ٤) تتبّع الأثر والانتقادات أشوف الناس بالغت في نقد بعض جوانب اللعب، ومنها تتبّع الأثر. بالنسبة لي، ما كان من المشاكل الأساسية اللي أثّرت على تجربتي. ملاحظاتي الأكبر كانت على تصميم المهام والمناطق وطريقة تقديم القصة. ٥) أكبر مشكلة: تصميم الأماكن والمهام مناطق كثيرة مصممة بشكل جميل، لكنها توحي لك إن عندك مساحة للاستكشاف، ثم تكتشف إنك محصور بمسار محدد. جمالها ما كان يقابله استغلال فعلي يخدم اللعب، وهذا خلاني أتساءل عن فائدة هالمساحات. ٦) الخطية كانت تحتاج استغلالًا أفضل تصميم المناطق أعطاني إحساس كأن اللعبة كانت مهيأة لعالم مفتوح ثم صارت خطية؛ هذا انطباعي، مو معلومة عن تطويرها. تمنيت استثمار الخطية في مراحل أكثر تركيزًا وتنوعًا، مثل اللي قدمته إنسومنياك في راتشيت آند كلانك: ريفت أبارت. ٧) القصة ما شدتني السرد ممل في أجزاء كثيرة، والأحداث متوقعة وتفتقر للتشويق. ما لقيت فيها مقومات كافية تخليني متحمس أعرف وش بيصير بعدها. وهذا أثّر على ارتباطي بالرحلة، حتى في الأوقات اللي كنت مستمتع فيها باللعب. ٨) عالم غني وشخصيات باهتة عالم إكس مين مليان شخصيات مميزة، لكن تقديم أغلب الشخصيات هنا ما أعطاها حضورًا يعلق بالذاكرة. حسّيتها بلا روح، وحتى الشخصيات الشريرة افتقدت التأثير والدور اللي يخدم القصة بشكل مقنع. ٩) وولفرين وجين غراي شخصية وولفرين نفسها كانت جيدة، ومسار قصته ساعدني أفهم طباعه ودوافعه رغم ملاحظاتي على السرد. أما جين غراي فكانت الاستثناء الأبرز بين الشخصيات المساندة؛ حضورها أعجبني لدرجة تمنيت أقدر ألعب بها. ١٠) شجرة المهارات للأمانة، شجرة المهارات حسّيتها شكلية أكثر من كونها إضافة مؤثرة. كنت أتمنى يكون دورها أوضح في تطوير أسلوب اللعب وإعطائي إحساس بالتقدم، خصوصًا مع التكرار اللي تعاني منه المواجهات. ١١) الموسيقى والصوتيات ما تركت عندي أثرًا يُذكر بعد ما خلصت اللعبة، بعكس ألعاب إنسومنياك السابقة مثل سبايدرمان وراتشيت. ما كان فيها شيء علق بذاكرتي بالشكل اللي كنت أتمناه من تجربة بهالشخصية. ١٢) الخلاصة والتقييم وولفرين لعبة استمتعت فيها، وقدّمت قتالات حماسية وإحساسًا مقنعًا بالشخصية. لكن التكرار وضعف السرد وتصميم المهام حدّت من التجربة. تقييمي: ★★★☆☆☆ — جيدة وش أكثر جانب يهمكم في لعبة لوولفرين: القتال، القصة، أو استغلال عالم إكس مين؟