”بكى صاحبي لمَّا رأى الدَّربَ دونَنا
وأيقنَ أنّا لاحقانِ بقيصرا
فقلتُ لهُ: لاتبكِ عينُكَ إنَّما
نُحاولُ مُلكًا أوْ نموت فنُعذرا!“
الفترة اللي فاتت كان عندي أكتر من مشكلة وأكتر من أزمَة بعدي بيهم، وكلّهم بيتحلوا بفضل الله من غير حول منّي ولا قوة.. بعد ما المشكلة بتتحل بدخل في اللي بعدها على طول واتضايق وأعمل حساب اللي جاي من غير ما أقف مع نفسي وأحمد ربنا على كرمه في اللي فات.. النهاردة وأنا بسمَع تلاوة الشيخ ياسر الدوسري لسورة التوبة.. اتأثّرت وهو بيرتّل ﴿لَقَد نَصَرَكُمُ اللَّهُ في مَواطِنَ كَثيرَةٍ﴾ .. لأول مرة أحسّ الآية كإنها ليّا أنا، رسالة خلتني أراجع نفسي وأحس بنعم ربنا اللي كنت غافل عنها.. الحمدلله حتى يرضى، اللهم بك أحاول، وبك أصاول، وبك أُقاتل.
رغم كل اللي بتعمليه.. أنا مش عايز أتغرّب.. مش لشيء إلا إني مش عايز أبويا وأمي يشيخوا وأنا بعيد عن عينيهم.
اللي يعرفني على فيسبوك ميعرفنيش على الإنستجرام، واللي يعرفني على الإنستجرام ميعرفنيش على تويتر، واللي يعرفني على كل دا مقابلنيش في الحقيقة، واللي قابلني مقعدش معايا، واللي قعد معايا متكلمش معايا في كل جوانب الحياة وسمع كل آرائي بما يكفي لإنه يبني تصوّر كامل عني..
عشان كدا.. متحكمش على حد من مجرّد معرفتك السطحية بيه وتبني عليه آمال أو تظنّ فيه سوء من مجرد تصفّحك لفيديوهاته أو منشوراته القصيرة.
وخلي عندك دايمًا مرونة نفسية في تقبّل خطأ الآخرين واختلافهم عن أفكارك وآراءك وتصوراتك عنهم، متقفش جنب مقصلة منصوبة للجميع، اترك مساحات إنسانية للاختلاف والخطأ والنسيان ومجاهدة الإنسان نفسه وما فُرض على الشخص من قِبل تجارب حياتية متعرفهاش.. مش بقولك تمايع مع الجميع ولا تختلف مع أحد، بالعكس بشجعك على تحديد اختلافاتك مع الأشخاص وبناء تصوّرات عن أفهامهم وآراءهم في مسائل دون مسائل فتأخذ أقوالهم فيما يوافق رأيك وتتغاضى عن أقوالهم في نقاط الخلاف فلا تقبلها.. لكن لما تختلف لا تطعن بالكُلية، وتشخصن المسائل، وتتجاوز الحدود..
اترك مساحة من التفاهم والتعايش، مش لازم كله يبقى معاك ولا كله يكون ضدك، إحنا مش في حرب.
”حاول ما استطعت ألّا تنظر إلى نفسك بوصفك ضحية. ومهما ساءت أحوالك، فلا تُلقِ باللوم على شيء أو أحد: لا على التاريخ، ولا الدولة، ولا رؤسائك، ولا والديك، ولا أطوار القمر، ولا طفولتك، ولا حتى على الطريقة التي تعلّمت بها استعمال المرحاض في صغرك… فما إن تُلقي باللوم على غيرك حتى تضعف عزيمتك عن تغيير أي شيء!“


