محمد طلال السعيد

تشرفنا باللقاء الأبوي مع سمو أمير البلاد الشيخ #مشعل_الاحمد حفظه الله، واستمعنا لنصحه وتوجيهه ورؤيته لكويت المستقبل، وسعدت شخصياً بأنه يناقش تفاصيل صغيره كتبت عنها ونشرتها، بكل اهتمام. الله يحفظك ويمد في عمرك للكويت، وان يعينوك الوزراء حتى يتحقق ما تخطط له لخير الكويت وشعبها.

ماعرف والله فنياً له علاقه ولا لا.. بس منتخبنا يلعب احسن في اي ملعب غير استاد جابر. #الكويت_سوريا

نشكر الاتحاد الكويتي لكرة القدم والشيخ احمد اليوسف @KuwaitFA على حسن الاختيار.. اول بوادر العمل الحقيقي واصلاح المنظومة تعيين الفاضل محمد بنيان ضمن الجهاز الاداري للمنتخب. بالتوفيق بوعبدالله

اللي يقول المشروع السعودي مانجح ماعنده سالفه.. هدف السعودية استضافة كأس العالم وحققوا هدفهم، ومعاها تطوير البنية التحتية لسنوات قادمة لمصلحة وفائدة الرياضة، والشباب السعودي. جيل سعودي شاب سيشهد تنظيم واستضافة عن الاقل 5 احداث رياضية عالمية، ويكتسبون خبرات، ويطورون مهاراتهم وتنتفع فيهم البلد.. شلون المشروع مانجح؟ استثمرت السعودية في الرياضيين، والشعب، والبنية التحتية، وسوقت اسم البلد وجلبت سياح واستثمار.. شنو باقي بعد؟ يصير فوق الدوري الاسباني عشان تقول نجح؟ اللي ينطر للانتصارات "الفردية" للأندية او الحضور الجماهيري او تصنيف الدوري عالماً هذا عنده "قصر نظر". خلال 3 سنوات من دوري "غير متابع" على مستوى العالم و3 الى 4 اندية فقط معروفة على مستوى القارة، الى 100+ قناة ومنصة ناقلة لمباريات الدوري عالمياً، شلون المشروع مانجح؟ ياليت عندنا "ربع" اللي عندكم رياضياً.

السالمية وكاظمة ليلحين احلى مباراة من بدى الموسم

6174 دك؟ ياخي حرام والله على مستوى التعليم والمناهج السيئة. الدراسة في افضل المدارس الخاصة تكلف نص المبلغ، والمقابل؟ تعليم افضل من التعليم الحكومي، ولغة انجليزية صح وتأسيس، ومناهج افضل وبيئة افضل وجاهزية مدارس لا تقارن بأحدث مدارس وزارة التربية. ماعندنا الا الشيخ فهد اليوسف نوجه له الكلام لأن بس هو اللي ياخذ قرار، الباقي استعراض وكاميرات وفلاشات عشان يقعدون بالمناصب لأطول فترة ممكنه. بوفيصل.. بعد التحية: خصخصة المدارس الحكومية كلها عن بكرة ابيها.. لا تخلي ولا مدرسة شركات كويتية شركات قطرية اماراتية بريطانية افتح.. للكل. الحكومة تدفع دعم 2000 دك عن كل طالب للمدرسة بشكل مباشر "مثل البعثات الداخلية" الطالب الكسلان واللي مايجابل تعليمه تسحب منه البعثه ويبتلش فيه ولي الأمر يقوم سلوكه ويجابل تعليمه ويصير آدمي. وعلى جودة التعليم وتحسين المخرجات فلتتنافس الشركات "المدارس". توفر الوزارة رواتب المدرسين تقلص ميزانيتها لرقم لا يذكر، وتوفر 4000 دك عن كل طالب سنوياً وتاخذ مخرجات تعليم نظيفة ترتقي في البلد. @KuwaitiCM

الاخوة في البنك المركزي @CentralBank_KW اذا الاسم مو مطابق بالتحويل، المفروض البنك اللي رايحتله الفلوس يرفض التحويل عدل؟ ويرجعه للجهة اللي محوله، مايصير تحول مثلاً باسم شركة محمد ويروح حق شركة خالد وينقبل.. ولا شنو فايده كتابة اسم المستفيد؟ شوفولنا حل مع البنك التجاري @ALTijariCBK من شهر 7 محولين مبلغ على رقم ايبان غلط ومسوين claim. بنكنا 3 شهور يطارد وراهم بدون اجابة، وعقب يتصلون يقولون والله مانقدر نسوي شي دبروا حالكم كلموا الشركة اللي محولين لها يردون لكم الفلوس. نلغي الحوالات ويصير الوضع دبر حالك احس؟

تحية لكل مسؤول قاعد يشتغل على هذا الملف ويساهم في رفع اسم الكويت من القائمة الرمادية في FATF. @KuwaitiCM

التفاؤل المفرط بـ #قانون_الرياضة الجديد وكأنه الحل السحري يبين لك شكثر الشارع الرياضي مسكين، وينقص عليه بسرعه. وصار التسجيل اون لاين؟ خير ياطير يعني؟ بتسجل؟ الادارات بسجلون كثرك مرتين ويستمر الوضع على ماهو عليه.. يزرق كرسي كرسيين بالغلط ويستمر الوضع المزري للرياضة. بعينون الحكومة عضوين بمجلس الادارة؟ ايه خير ان شاءالله منو بعينون؟ ارسن فنجر في الصليبيخات ولابورتا في الساحل؟ لك في تعيينات الجمعيات التعاونية خير مثال على حسن الاختيار.. ولك في ووزير الرياضة بكبره ومدير الهيئة خير دليل. بتخلي الاندية تزيد مساحات الاستثمار؟ وبتدش الدولة تاخذ نسبة وبتراقب؟ وبعدين؟ مارده يجيك وزير "خفيف" يخاف من تويتر يكتبون عنه ويهاجمونه يروح يسلط البلدية وكل جهات الدولة على ادارة النادي وياخذ اللقطة. الرياضة من غير خصخصة "انسى" ما ينصلح حالها، الملاعب بدون عقود BOT مع الدولة طويلة الامد واطلاق يد الادارات للاستثمار وجلب الايرادات واعادة تسمية الملاعب وبيع الحقوق انسى. واللاعبين بدون احتراف "كلي" وقانون تأمينات خاص وتقاعد ونهاية خدمة، ماراح يوصلون مستوى دول الخليج. والنقل التلفزيوني المزعج والجودة السيئة قبل كل شي. مساكين والله.. نطروا قانون الرياضة ايه، ثاني يوم بناخذ كاس العالم.

الخرقاوي والشلال يفصلون 10 من المحترفين #القادسية_العربي

الملاحظ كل انديتنا اعتمدوا "الثيل الصناعي" على المضمار في محاولات لتجميل الملعب وفي رسالة ان المضمار "لا يستخدم ابداً". الثيل الصناعي لونه مختلف.. و "ويتفچچ" ويصير فيه فراغات، والنتيجة المنظر البشع اللي بالصورة وعدم تناسب درجة الاخضر مع ارضية الملعب، بالاضافة الى سوء جودة النقل التلفزيوني.. فيخرج بالنهاية منتج نهائي بشع جداً. الاخوة في الهيئة، ادري والله لا حياة لمن تنادي بس نقول عل وعسى لا مشيتوا يجي واحد وراكم "يفعل".. مافي ولا نادي يبي المضمار. كل ملاعبنا قديمة وبشعه، اطرحوا مناقصات جديدة توسعة المدرجات "تنزيلها وتقريبها من الملعب مع تركيب تكييف" .. تغيرون المنظر العام وتخطون خطوة نحو تطوير "الشكل". @PaysKwt اما الاحبة في وزارة الاعلام.. والقناة الثالثة تحديداً، والله مالكم فيها يا احباب. النقل التلفزيوني الرياضي في عالم وانتوا في عالم موازي، جودة بث سيئة واختلاف الوان كاميرات، صورة Pixels مزعجه جداً، Iris مو عارفين مصورينكم ومخرجينكم يضبطونه عشان الصورة يطلع لونها موحد. الصورة يا تجهر عينك يا ظلمة، اخطاء بدائية مزعجه حتى وان اعتدناها كل اسبوع بنرجع نقولها. اطرحوا الدوري للاستثمار، اوفر عليكم 100% من الرواتب والمكافآت وحقوق النقل التلفزيوني للأندية.. اطلعوا منها تعمر. ومنا لمجلس الوزراء، وتحديداً الشيخ فهد اليوسف عل وعسى يلتفت عليهم مثل القوى العاملة. @KuwaitiCM

النقل التلفزيوني للدوري الكويتي يلوع الچبد.

اللي يبي يشتري لابتوب.. ينطر الوحش هذا ولا يخسر فلوسه على شي ثاني

اللي يحب انستاغرام بكيفه واللي يحب تويتر بكيفه، مايسوى الموضوع تتهاوشون عليه. Chill يا احباب

الاخوة بالقوى العاملة اتوقع الكلام واضح "نحاسب بعد.. مو قبل" "نحاسب بعد.. مو قبل" علقوها جدام كل الموظفين ملوت تقدير الاحتياج يعني لما نجيكم نبي عمالة تعطونا.. بدون "عساره" وبدون اسأله مالها داعي ولا افتراض ان الشركة تحتاج 5 بينما صاحب العمل مقدم 10. ليش صاحب عمل يقدم 10 وهو مو محتاجهم؟ مجنون؟ يبي يخسر؟ ولا لاقي فلوسه بالشارع ويبي يفسفس يوظف عماله؟ مع الحب والتقدير هل انت ورى المكتب فاهم طبيعة العمل اكثر من صاحب العمل نفسه؟ انا قاعد اتكلم عن اللي يشتغلون، تجار الاقامات انتو ادرى فيهم وعندكم طريقتكم تصيدونهم.