Nútíminn

Undanfarnar vikur og mánuði höfum við á Nútímanum tekið eftir óvenjulegu mynstri þegar kemur að dreifingu frétta sem fjalla gagnrýnið um Evrópusambandið. Þó við getum aldrei fullyrt með fullri vissu hvernig algóryþmi samfélagsmiðla virkar, þá höfum við þróað með okkur nákvæma tilfinningu fyrir því hversu mikinn lestur fréttir okkar fá fyrirfram. Í langflestum tilfellum standast þær ágiskanir ágætlega. Það sem hefur hins vegar ítrekað gerst er að fréttir eða umfjallanir sem sýna ESB í neikvæðu ljósi fá oft aðeins um 10-15% af þeim lestri sem sambærilegar fréttir fá vanalega. Við höfum einnig tekið eftir því að næstu færslur á eftir virðast oft fá minni dreifingu en venjulega, sérstaklega á Facebook. Þetta passar við það sem kallað er skuggabann (shadowban) og er notað til að draga úr sýnileika efnis sem ekki þykir æskilegt að fólk sjái án þess að eyða því. Á sama tíma er X eini miðillinn þar sem þessi munur virðist ekki koma fram með sama hætti. Hvort þetta sé ástæðan fyrir því að margir miðlar láti vera að snerta á fréttum sem sýna sambandið í neikvæðu ljósi er ekki hægt að fullyrða, en margir miðlar reiða sig að miklu leyti á dreifingu frétta á samfélagsmiðlum. Þetta er ekki bundið við Nútímann heldur. Brotkast reyndi meðal annars að kaupa aukna dreifingu á Youtube fyrir myndband þar sem meðal annars var rætt um Evrópusambandið og gagnrýni á það kom fram í myndbandinu. Youtube hafnaði auglýsingunni og skilgreindi efnið sem „pólitískt gildishlaðið efni“. Sambærilegar takmarkanir virðast hins vegar ekki eiga við þegar önnur pólitísk sjónarmið eru rædd. Við höfum einnig heyrt frá öðrum nokkuð stórum hlaðvarpsstjórnendum og miðlum sem telja sig hafa upplifað svipaða hluti. Á sama tíma hafa bæði bandarísk stjórnvöld og opinberir aðilar í Bandaríkjunum lýst yfir áhyggjum af afskiptum Evrópusambandsins af tjáningu og dreifingu efnis á samfélagsmiðlum, sem sýna sambandið í neikvæði ljósi. Þær takmarkanir eru svo sagðar sérstaklega hertar þegar mikilvægar kosningar eru framundan. Við teljum mikilvægt að lesendur séu meðvitaðir um þetta. Ef fólk treystir eingöngu á Facebook eða aðra samfélagsmiðla til að sjá fréttir frá okkur er raunveruleg hætta á að ákveðin umfjöllun skili sér einfaldlega ekki til þeirra. Þess vegna viljum við hvetja lesendur okkar til að gera Nútímann að reglulegum hluta af sínum netrúnti með því að fara beint inn á Nutiminn.is og þannig minnka líkurnar á að mikilvægar fréttir og umræður hverfi í ritskoðun og skuggabönnum.