أُمنيـه

شكرا لدكتورة أمنية هيا اللي شكت فيها وبدأت الموضوع دة وشكراً ليها مرة تانية علشان فضلت وراها لغاية ما قفلت كل أكونتاتها بعد ما كانت بترجع كل فترة وشكراً لكل واحد عمل ريتويت وكشف البلاوي اللي كانت عاملاها وشكراً للي لسة بيساعد من غير ما يلم ريتش ويعمل بلبلة عالفاضي الناس هنا عندها خير ولسة عايزين يساعدوا وبسبب شوية نصابين بيسحبوا نفسهم ويبطلوا يساعدوا خلوا الموضوع عام ومتثقوش فأي حد بيدخل خاص يطلب حاجة مش من حقه كل جنيه بيروح فالمكان الغلط بيأثر علي أسرة كاملة ممكن تتحرم من العلاج والأكل والايجار

للتذكير يا أهل الخير لما حد يكلمك عالخاص يطلب مساعدة كلمنا أو كلم غيرنا نتأكدلك من صحة الحالة، متبعتش لحد حاجة غير لما نشوف الأوراق سليمة ولا لا بسبب شوية أوساخ الناس فقدت مصداقيتها فالتبرع بشكل كامل وبقينا نخلص الحالة ف يومين تلاتة بعد ما كنا بنخلصها ف كام ساعة، وبطلنا ننزل الأوراق علشان بتتسرق وناس بتشحت بيها عالفيس بوك، بقينا نبعت الأوراق للي بيطلبها عالخاص ونأكد عليه متتبعتش لحد وبقينا محددين الناس اللي نساعدها جوة مصر فقط علشان نعرف نتأكد من حالتهم ونتابعهم ونشوف لسة محتاجين مساعدة دورية ولا لا فيه ناس محترمة هنا كتير ومش عايز ادخل الديانات فالموضوع بس فيه مسيحيين بيشاركوا في حالات كتير وانا إتعاملت معاهم شخصياً، بشكرهم بشكل خاص وانا شخص بدائي مش أكتيڤ غير عالابلكيشن دة ومعرفش أساعد الناس غير من هنا متخلوش شوية ناس مريضة يدخلوا فالخير ويبوظوا سلسلة المساعدات اللي بتحصل كل فترة علشان طمعهم وأنا أشهد إن فيه ناس هنا بتعمل الخير من غير دوشة ولا ظيطة هيفرقنا وجهات نظرنا وآرائنا وهيجمعنا الخير، ربنا يديمه بيننا جميعاً