يا جميلة جابك اللّٰه بعد طول انتظار
ليلةٍ جابتك بـ حماي أنا ممنونها
الجفا اللي صار واللّه ما ندري كيف صار
فترةٍ ما غاب شيطانها و جنونها
كلنا نشتاق و نحب و نضيق و نغار
ليه يوم نواخد قلوبنا بظنونها
عانقيني لين اشكّل على خصرك مدار
و اكحل عيون الليالي و أهد سنونها
العناق افضل وسيلة لـ تمهيد الحوار
الحوارات الجريئة كذا قانونها
ناوليني خمرة شفاك يا ذات الخمار
ودي انشدها وش اللي مزيّن لونها ؟
قطعتين كنّها من زهور الجلّنار
الثلوج خلافها و الجمر من دونها
و إن سرقنا الوقت و الليل كفكف و إستدار
و العيون نعاسها مستبيحٍ نونها
بـ اتوسّد حب خوخٍ عليه آثار نار
ويش ابي بـ وسادةٍ بـ القطن يحشونها
ساعةٍ في حضنك الغض عن ميّة نهار
اشتريها لو اسوق العمر عربونها
دونك تساق الملايين و تساق العمار
و البدو لا لاح خدّك تسوق ضعونها
هايف قدّك و لا فيه قدّك ف المهار
وسلة رموشك تفج الصدور طعونها
بـ إختصار انتي جمالك عدو الاختصار
و في عيونك تستهل القصيد عيونها
صغت فيك اللي ما صاغه جرير و لا نزار
شامخاتٍ من هزيل الشعور اصونها
كل الابيات الطويلة و الابيات القصار
كان ما هي فيك ما اتعب على مضمونها
يصبرني على ثقل الليال ان الأمل ما زال
ينسيني شقى النفس ويضوي لي متاهاتي
اغيب بلا سبب وبلا سبب يربكني الترحال
واعود للمكان اللي يضم اربع اتجاهاتي
مع اني هادي وجه وحكي لو ضاقت الاحوال
يجي هذا الحزن صخب ويلازم فكرة أبياتي
ورغم اني لزمت الصمت من رهبة ليال ثقال
يبان البوح في رجفة يدي ويبعثر سكاتي
نهب هذا التعب حلمي كسر بي قيمة الآمال
سرق لذة تفاصيلي سلب حلو ابتسامتي
طبعي شديد ولكن مرهف قلب وطويل بال
وبي صبر يتحمل حزن هالدنيا ب خيباتي
ليلة البارح حزنها وسط صدري طال
وقساها مثل قسوة دمعي الجارح وغصاتي
بقت بالذاكره ليله حزينه من سنين طوال
تجي في بالي السارح ترجعني لعثراتي
فقدت احلام عمري لين غصني للهبايب مال
وانا ماني مشتاق لأحد مشتاقة لذاتي
يا مقبله لا دعاك الهجر لا ترجعين
لبي ندا اللي صدى صوتك بسماعته
يوم احتواك وتعلقتي بـ حبل الوتين
علّق عبايتك ( امانه ) فوق شماعته
وإن غرك الشوق في عين النديم الحزين
ماغر عنقك ، سوا صدرك و دلاعته
استشعر الحب في عينك قبل تنطقين
واسمع دويّه بقلبك لـ وصل ( قاعته )
تماكني قبل لاتقلب عليك السنين
قلبٍ ليا طرّوا الفقدان يا راعته
يطقه الشوق مع حزة نسيم الحنين
و لا طقه الشوق يمك طق ولاعته
تعلقت كل الاماني على كلمتين
بينتظرها مثل ماينتظر ساعته
لكن نبي الفرصه اللي طولت لا تحين
قبل الفرح يعزم الزفه على قاعته
طيعيني ان كان تبغين العلاقه تزين
جعل الله يطول بعمرك على طاعته
انتي اعشقيني مؤقت ، " لين تزوجين "
وانا اعشقك ، لين ربي ( ياخذ وداعته )
حلمي تطاول علي ولا أقدر اطوله
يعبث براحة منامي ...ويتحداني
يطيح من عيني وياقف على طوله
وإن راح بَ شفوف نفسي عاد من ثاني
لو يستحي واقعي ماقيد.. رجوله
وخلاه مسجون في صمتي وكتماني
ياحاجة دونها البيبان ..مقفوله
رجيتها كان جتني.. لاتعداني
صدري يفيض بكلامٍ مقدر أقوله
أخاف لاجيت أقوله يجرح لساني
والناس عن رغبتي ماهيب مسؤوله
ماهي وكيله على شقاي واحزاني
مشكاي للي يحل الضيق ويزوله
منه الفرج مانخيت فلان وفلاني
القوه ب قوته والحول من حوله
خلاق يعلم بما شلته ب وجداني
بصير ب أحوال منقوضه ومفتوله
سميع ماقالت النمل ل سليماني
أرجوه من رحمته حاجات مجهوله
أخفيتها والليال السود تحداني
أجامل الخلق والأفكار مشغوله
اضحك مع وجيه خلاني وصدقاني
كبدي من أربع وخمس شهور معلوله
خيم على صدري الهوجاس وأعياني
ردو سلامي على حظي وقولوله
خاب الرجاء ياعساه يجيه ماجاني
عن وقفته طايب ويمناي مغسوله
جعله يدورني ولاعاد ... يلقاني
وجهتها لـ اللّه الوهاب منقوله
مجري هبوب الرياح ومحيي الفاني
تنساني الناس والأعذار مقبوله
واللي خلقني يدبرني ماينساني



