Obwakabaka bwa Buganda buwabudde kkampuni za yinsuwa okukomya okukandaaliriza okuliyirira ba kkasitoma baabwe nga bafunye obuzibu kubanga kiviirako abantu okuzijjamu obwesige. Bino byogeddwa Omumyuka Owookubiri owa Katikkiro Oweek. PDG Robert Waggwa Nsibirwa bw'abadde alungamya olukiiko olukulembeze olwa Yinsuwa y’Obwakabaka Weerinde Insurance Brokerage Services Limited, ku ngeri gye lunaatambuzaamu emirmu. Bano Oweek. Waggwa Nsibirwa abalambise ku kwetegereza emitendera n’entambuza y’emirimu okukakasa nti nkwafu era nkakafu okulaba nga ekitongole ekibatwala mu ggwanga ki Insurance Regulatory Authority tekirina kwekengera kwonna eri kkampuni y’Obwakabaka eno. Olutuula lwa leero Oweek. Nsibirwa alwogeddeko nga bwe lugenda okuvaamu ebirowoozo ebigenda okuyamba yinsuwa yóbwakabaka eno okusitula empeereza y'ayo mu kisaawe kya yinsuwa. Ssenkulu w’Olukiiko olukulembera yinsuwa eno, Omuk. Ronnie Mutebi Nsubuga akakasa nga bwe bagenda okusitula omutindo mu nkola y’emirimu olwo yinsuwa y’Obwakabaka esitule bulungi embeera z'abantu ba Beene. Omukungu Jennifer Mirembe Ssensuwa, Ssenkulu wa Weerinde Insurance Brokerage services Ltd, atenderezza nnyo obwerufu n’okulambikibwa Obwakabaka kwe buwa abantu baabwo abafunye obuvunaanyizibwa nga buno, bw’atyo yeyamye ku lw'ekitongole okwongeramu amaanyi mu bye babadde bakola ebbanga lyonna. Ensisinkano ebadde ku Jevine Hotel mu Ndeeba.

Katikiro asisinkanye ba ssenkulu ne bassentebe ba bboodi z'ebitongole by'obwakabaka okusala entotto ku kwongera okusitula omutindo mu mpeereza y'emirimo eri abantu ba Kabaka. Mu bubaka bwe, Katikkiro abakubirizza okwongera okunyweza enkolagana wamu n'okunnyikiza ennyingo omukaaga eza situla omutindo nga bali mu buweereza bwabwe. "Enteekateeka ya situla omutindo erimu ennyingo mukaaga era ennyingo ezo zizingiramu engeri ebitongole by'obwakabaka gyebikolamu emirimu kubanga ennyingo ezo zikwata ku bantu mu mbeera zaabwe eza bulijjo n'olwekyo wateekwa okubaawo omutindo ogusinga okuba ogwa waggulu mu bitongole" Katikkiro Mayiga bw'agambye. Mukuumaddamula era akubirizza bassenkulu bano okufuba okulaba nga ebitongole wamu ne kampuni zebakulembera zikola amagoba kiyambe okutambuza obulungi emirimo gya Kabaka era n'abasaba okwewala okwekwasa obusongasonga obutaliimu. Kamalabyonna yebazizza ba Ssentebe abaggya olw'okukkiriza okuweereza Kabaka waabwe. Abakubirizza okuteekawo empenda okusobola okuvvuunuka obuzibu obuba bubagwiridde obutali bumu kubanga obukulembeze kitegeeza kutema mpenda ezivvuunuka ebizibu. Ssentebe wa ba Ssenkulu, Omukungu Roland Ssebuwufu, ategeezezza Katikkiro nti ensonga y'obumu n'okunyweza obwa sseruganda bibayambye nnyo okutambuza emirimo gy'ebitongole n'okubasobozesa okusasula emisoso egitali gimu.