𝐈𝐡𝐚𝐦𝐞 𝐫𝐲𝐚 𝟗: 𝐆𝐈̀𝐒𝐀 | 𝐈𝐡𝐚𝐦𝐞 𝐫𝐲𝐨 𝐤𝐰𝐢𝐠𝐢𝐫𝐚 𝐧𝐨 𝐤𝐮𝐛𝐚𝐬𝐡𝐚 𝐤𝐰𝐢𝐠𝐞𝐧𝐞𝐫𝐚 𝐢𝐛𝐢𝐤𝐰𝐢𝐫𝐢𝐲𝐞 Igihugu kigomba kubaho gifite ibihagije kandi kibasha kwigenera ibigikwiriye kidategereje abandi babikora ahubwo kibigizemo uruhare ku giciro cyose byasaba. Gutera imbere no guteza imbere imibereho myiza y’abaturage bacyo ni ngombwa. Umuturage akwiye kubaho afite iby’ibanze kugeza ku buzima bwiza, nk’ishingiro rikuru ryo kubaho kw’igihugu. Ubuyobozi na buri muturage bagomba kurangwa n’ubwangamugayo, ukuri, amahoro n’ubufatanye kugira ngo igihugu gikomeze kugira ituze n’iterambere birambye ari byo murage w’Abanyarwanda bose mu gihe kizaza. Icyambura u Rwanda, igisenya u Rwanda ntigikwiriye kubaho ubuzima butuje, kugeza ku giciro gisumba ibindi, u Rwanda rukabaho rwujuje. @RwandaLocalGov @UrugwiroVillage @IntekoyUmuco

𝐈𝐡𝐚𝐦𝐞 𝐫𝐲𝐚 𝟖: 𝐑𝐀𝐀𝐍𝐃𝐀 | 𝐈𝐡𝐚𝐦𝐞 𝐫𝐲𝐨 𝐤𝐮𝐠𝐚𝐧𝐳𝐚, 𝐠𝐮𝐡𝐚𝐦𝐲𝐚 𝐢𝐠𝐢𝐭𝐢𝐧𝐲𝐢𝐫𝐨 𝐧𝐨 𝐠𝐮𝐤𝐨𝐦𝐞𝐫𝐚 Igihugu kimaze kwiyubaka, kigomba kuganza hose binyuze mu irage ryacyo ndangamuco rigitera kunoza imirimo yacyo mu buryo bukururira benshi gushaka kunyura muri iyo nzira. U Rwanda ntabwo runyurwa n’utuntu duto cyangwa ibyo abandi bita binini ku buryo bwarutera kumva rwararangije kugera ku ntego, rukadamarara. Kirazira kwirata ibikorwa kuko n’ubundi ari cyo igihugu gitegerejweho gukora, ahubwo intambwe imwe itanga indi mu nzira yo kubaka u Rwanda. U Rwanda kandi ruranda muri bose, hose rurema amasano magari, ngo rugwize amaboko arengera igihugu. Uko ni ko u Rwanda ruranda imyaka yose. @RwandaLocalGov @UrugwiroVillage @IntekoyUmuco

𝐈𝐡𝐚𝐦𝐞 𝐫𝐲𝐚 𝟕: 𝐌𝐄𝐑𝐀𝐍𝐎 | 𝐈𝐡𝐚𝐦𝐞 𝐫𝐲’𝐮𝐛𝐮𝐝𝐚𝐡𝐞𝐫𝐚𝐧𝐰𝐚, 𝐤𝐰𝐢𝐲𝐮𝐛𝐚𝐤𝐚 𝐧𝐨 𝐠𝐮𝐤𝐨𝐦𝐞𝐫𝐚 Igihugu kirinda guheranwa cyangwa kurangazwa n’ibikigerageza byose, ahubwo kigahera aho kigashinga umuzi kikamera kurushaho. Iyo hagize igihagurukira u Rwanda ngo kirusenye, ni yo nzira yo gushaka ibisubizo birutera kurushaho gukomera, imizi y’igihugu ikarushaho gushora kure. Ni ngombwa ko igihe igihugu kinyuze mu ngorane, kidaheranwa na zo cyangwa ingaruka zazo, ahubwo kiriyubaka kigakomera kurusha mbere. Igihe cy’ibyago cyangwa ibibazo si cyo gihe cyo guhangayika, ni igihe cyo kubaka imbaraga nshya kuruta iza mbere. Ubuyobozi na buri muturage bagomba guhindura ibikomeye bahuye na byo isoko yo gukura kurushaho, kwishakamo ibisubizo, kwiyubaka no kurushaho kugira uruhare mu iterambere ry’Igihugu. U Rwanda rugomba guhora rumera, rukaganza kandi rugakomera. @RwandaLocalGov @UrugwiroVillage

𝐈𝐡𝐚𝐦𝐞 𝐫𝐲𝐚 𝟔: 𝐊𝐎𝐎𝐁𝐎 | 𝐊𝐰𝐢𝐫𝐢𝐧𝐝𝐚 𝐤𝐮𝐠𝐰𝐚, 𝐤𝐰𝐚𝐧𝐠𝐚 𝐠𝐮𝐭𝐬𝐢𝐤𝐚𝐦𝐢𝐫𝐰𝐚 𝐧𝐨 𝐠𝐮𝐡𝐨𝐫𝐚𝐧𝐚 𝐮𝐛𝐰𝐞𝐦𝐚 𝐧’𝐚𝐠𝐚𝐜𝐢𝐫𝐨. Igihugu kigomba kwirinda kugwa uko ariko kose cyangwa guhezwa hasi n’icyo ari cyo cyose ku bw’imbaraga. U Rwanda rugomba guhora mu bwema bwarwo igihe cyose; mu buryo bwose ntabwo rushobora guhezwa mu mwobo w’ubugwari no gutsindwa. Igihe cyose ubuyobozi n’abaturage bareberera u Rwanda ko nta mpamvu zatera u Rwanda kugwa, kuko ntirushobora kugwa abarwo batarutengushye. Buri wese afite inshingano zo kudatuma u Rwanda rugwa ngo rurambarare, ruhere aho. Ni inshingano ya buri wese gusigasira igisenge kirinda u Rwanda, rukaba igihugu kiyegura iteka iyo gisunitswe. Ubuyobozi na buri muturage bagomba kwanga gucika intege, bakihanganira ingorane kandi bagaharanira kongera kwiyubaka no gukomeza gutera imbere. Nta kure hashoboka u Rwanda rutakwikura; naho haba mu mwobo, ruba imbuto rukazamukana ubwema n’agaciro kenshi kurusha mbere. @RwandaLocalGov

𝐈𝐡𝐚𝐦𝐞 𝐫𝐲𝐚 𝟓: 𝐊𝐈𝐉𝐔𝐑𝐔 | 𝐈𝐡𝐚𝐦𝐞 𝐫𝐲𝐨 𝐠𝐮𝐡𝐨𝐫𝐚 𝐤𝐮 𝐢𝐬𝐨𝐧𝐠𝐚 𝐧𝐨 𝐤𝐮𝐛𝐚 𝐢𝐧𝐝𝐚𝐬𝐡𝐲𝐢𝐤𝐢𝐫𝐰𝐚 Igihugu gihora mu ntego yo guhora ku isonga. Ubutarushwa, ubudashyikirwa, no kuba nyambere mu bindi mu bindi bihugu ni inshingano. U Rwanda n’Abanyarwanda bakwiye kugira imyumvire yo kutaba abo ku rwego rwa Kabiri, ni ngombwa kuba ku ruhembe rw’imbere. Ubuyobozi buteza imbere imikorere no guhanga ibishya biri ku rwego rwo hejuru, naho buri muturage akagira inshingano yo guharanira kuba indashyikirwa, kugira ubutwari, kwihangana no guhamya intego.

𝐈𝐡𝐚𝐦𝐞 𝐫𝐲𝐚 𝟒: 𝐊𝐈𝐌𝐀𝐍𝐔𝐊𝐀 | 𝐈𝐡𝐚𝐦𝐞 𝐫𝐲’𝐮𝐛𝐮𝐝𝐚𝐡𝐚𝐧𝐠𝐚𝐫𝐰𝐚 𝐛𝐰𝐚 𝐦𝐮𝐧𝐭𝐮 𝐧𝐤’𝐢𝐧𝐤𝐨𝐦𝐨𝐤𝐨 𝐲’𝐈𝐠𝐢𝐡𝐮𝐠𝐮. Buri muntu ni umunyagitinyiro, ntavogerwa kandi ni we shingiro n’isoko byo gukomeza kubaho kw'Igihugu. Ubuyobozi bufite inshingano zo kurinda, kubungabunga no guteza imbere agaciro, ubusugire n'iterambere bya buri muntu, na we akagira inshingano yo kurangwa n'imyitwarire irimo ikinyabupfura, kubaha n'ubudahemuka ku ndangagaciro z'Igihugu.

𝐈𝐡𝐚𝐦𝐞 𝐫𝐲𝐚 𝟑: 𝐌𝐔𝐔𝐍𝐓𝐔 | 𝐈𝐡𝐚𝐦𝐞 𝐫𝐲’𝐮𝐛𝐰𝐢𝐲𝐮𝐧𝐠𝐞 𝐦𝐮 𝐛𝐮𝐦𝐰𝐞. Igihugu kiyoborwa mu bwiyunge bwa bose, burema ‘Umuntu’ ari we ‘umwe’ uhatse bose, akaba bose, bakaba we, bakarema ‘Ubumwe’. U Rwanda rubaho rugwije kutabeera, ubugororoke no kurengera bose. Buri wese afite inshingano yo kubungabunga ubumwe yirinda icyica ubwiyunge. Kumvira no kubaha inzego z’ubuyobozi ni ihame. Ikintu cyose kibuza Abanyarwanda kubaho biyunze, barema u Rwanda ni icyago, ni ikizira cy’iri hame. Nta muntu aho yaba ari hose, wemerewe gushyigikira, kwigisha cyangwa gucengeza iyo myumvire itandukanya abantu. Umuntu cyangwa itsinda ry’abantu bishora muri ibyo, bakubitwa n’imbaraga z’ubwirinzi bw’u Rwanda. Ubumwe bw’Abanyarwanda ni ihameshingiro; ntibuvogerwa, ntibushobora na rimwe kujyibwaho impaka cyangwa gushidikanywaho.

𝐈𝐡𝐚𝐦𝐞 𝐫𝐲𝐚 𝟐: 𝐊𝐈𝐆𝐖𝐀 | 𝐈𝐡𝐚𝐦𝐞 𝐫𝐲'𝐮𝐛𝐮𝐝𝐚𝐡𝐢𝐧𝐲𝐮𝐤𝐚 𝐧’𝐮𝐛𝐮𝐬𝐮𝐠𝐢𝐫𝐞 𝐛𝐰’𝐈𝐠𝐢𝐡𝐮𝐠𝐮. Igihugu cyose, gikubiyemo ubutaka bwacyo, ibiburiho, ibiburimo n’ikirere cyacyo kugeza mu ntimatima y’imyumvire y’abantu bacyo; ni intatandukanywa, kandi gifite ubusugire busesuye. Ubusugire bw'igihugu ntibushobora guhererekanywa, gutangwa, kwigarurirwa, kugabanywa cyangwa guteshwa agaciro mu buryo ubwo ari bwo bwose. Igikorwa cyangwa amasezerano ayo ari yo yose abangamira cyangwa yambura Igihugu igice icyo ari cyo cyose, birabujijwe, nta gaciro bifite kandi nta shingiro ry’amategeko bishobora kugira.

𝐀𝐌𝐀𝐇𝐀𝐌𝐄𝐑𝐄𝐌𝐄𝐙𝐎 𝐀𝐆𝐄𝐍𝐆𝐀 𝐈𝐌𝐈𝐘𝐎𝐁𝐎𝐑𝐄𝐑𝐄 𝐌𝐔 𝐑𝐖𝐀𝐍𝐃𝐀 𝐑𝐖𝐎 𝐇𝐀𝐌𝐁𝐄𝐑𝐄. 𝐈𝐡𝐚𝐦𝐞 𝐫𝐲𝐚 𝟏: 𝐒𝐇𝐘𝐄́𝐑𝐄́𝐙𝐎 | 𝐈𝐡𝐚𝐦𝐞 𝐫𝐢𝐡𝐚𝐦𝐲𝐚 𝐮𝐛𝐮𝐤𝐮𝐫𝐮 𝐛𝐰’𝐈𝐠𝐢𝐡𝐮𝐠𝐮 Igihugu ni cyo shingiro rikuru ry’imyumvire yose mu busugire bwacyo, ntigihemukirwa kandi ni imbundo nshinganwa. Buri wese mu gihugu cyangwa mu mahanga, abaho ubuzima bwiyemeje kurinda, kubungabunga no guteza imbere Igihugu mu bikorwa bye byose, yaba iby’Ubuyobozi cyangwa ibye bwite. Igikorwa cyangwa uburangare ubwo ari bwo bwose byatera kubangamira inyungu, ubusugire cyangwa ubudahangarwa bw’Igihugu birabujijwe kandi nta gaciro na gato bigira imbere y’amategeko. Ubikoze wese ntabikira.