UsaPingLacson

𝗠𝗘𝗥𝗢𝗡 𝗡𝗚𝗔 𝗔𝗞𝗢𝗡𝗚 𝗞𝗔𝗞𝗜𝗟𝗔𝗟𝗔 𝗦𝗔 𝗧𝗩 𝗟𝗔𝗡𝗚 𝗡𝗔𝗚-𝗔𝗗𝗠𝗜𝗧, 𝗡𝗔𝗞𝗨𝗟𝗢𝗡𝗚 𝗘𝗛! Kinuwestiyon ni Senator-Judge Panfilo 'Ping' Lacson kung bakit mas pinaniniwalaan ng isang testigo ng depensa ang mga corporate record ng GenCorp Industries kaysa sa mismong Statement of Assets, Liabilities and Net Worth (SALN) ni Vice President Sara Duterte sa nagpapatuloy na impeachment trial ng bise presidente. Sa pagtatanong kay Atty. Suzette Balucanag-Punay, corporate counsel ng GenCorp, inusisa ni Lacson kung alin ang may mas mabigat na halaga bilang ebidensiya sa pagitan ng isang notarized admission against interest at mga opisyal na dokumento tulad ng General Information Sheet (GIS) na isinumite sa Securities and Exchange Commission (SEC). Sumagot si Balucanag-Punay na para sa kaniya ay mas mabigat ang SEC records, dahilan upang kuwestiyunin ito ni Lacson at banggitin ang Rule 130 ng Rules of Court tungkol sa mga admission na maaaring gamitin bilang ebidensiya. 'Meron nga akong kakilala sa TV lang nag-admit, nakulong eh. Ito notarized pa ito, itong SALN,' ani Lacson. Bagama't walang direktang pinangalanan si Lacson, maaalalang nakakulong ngayon si Senator Rodante Marcoleta dahil sa kasong plunder kaugnay ng umano'y ₱75 milyong hindi idineklarang campaign donations na una niyang inaming natanggap sa isang television broadcast noong 2025. Gayunman, nilinaw ni defense counsel Atty. Justin Gular na ang admission against interest ay isang exception sa hearsay rule at hindi awtomatikong batayan sa pagtukoy kung aling ebidensiya ang may mas mabigat na probative weight. Iginiit naman ni prosecution counsel Atty. Lorna Kapunan na mataas ang halaga ng admission bilang ebidensiya, lalo na kung nagmula mismo sa taong sangkot sa kaso. Ipinaliwanag ni Presiding Officer Senator Francis Escudero na parehong may punto ang magkabilang panig, ngunit nasa bawat senator-judge ang pagpapasya kung gaano kabigat ang mga ebidensiyang iniharap. Kung maaalala, naunang tumestigo si Balucanag-Punay na walang shareholdings o corporate position si VP Sara sa GenCorp mula 2022 hanggang 2025, bagama't mayroon umano itong 'loose investment' sa Jollibee Times Square branch na pinatatakbo ng kumpanya. #