Ash

في نهاية فيلم The Odyssey، أوديسيوس قاعد مع زوجته بعد ما قتل أغلب الخطاب وحكالها عن أهوال رحلته وازاي انهم اتلعنوا لأنهم خرقوا قوانين زيوس وانهم هما نفسهم شعوب البحر اللي الناس بتحكي عنهم وبتخاف منهم.. يعني إيه "إحنا شعوب البحر" اللي قالها دي؟ عشان تفهم الجملة دي محتاج تفهم السياق التاريخي الأول، تعالى معايا ناخد الموضوع من أوله ونفهم.. العصر البرونزي من 3300 قبل الميلاد ل 1200 قبل الميلاد: العصر ده على عكس ما يعتقد الناس كان شبه عصرنا الحالي جداً خصوصاً في الفترة الأخيرة منه، كان العالم بيحكمه عدة إمبراطوريات وممالك أشهرهم الإمبراطورية المصرية والإمبراطورية الحيثية في الأناضول وممالك بلاد الرافدين وبعض الممالك الأخرى زي المملكة المايسينية في اليونان ودي هانجيلها لاحقاً، الامبراطوريات دي كان بيحكمها حكومات بيروقراطية فيها نظام إداري متين وبيتاجروا مع بعض وبيحاربوا بعض أحياناً أو يمارسوا الدبلوماسية أحياناً، بيتبادلوا السفراء والرسائل والهدايا وعندهم جيوش نظامية محترفة ومنظومة إدارة اقتصادية للزراعة وتخزين الحبوب وفي طبقة متعلمة في كل دولة بتمارس دور موظفين الدولة في النظام الإداري.. اتسمى بالعصر البرونزي لأن كل أدوات الزراعة والصناعة والأسلحة في العصر ده كانت بتتصنع من معدن اسمه البرونز وده سبيكة من النحاس والقصدير بتتميز بالصلابة، النحاس كان منتشر نسبياً لكن القصدير كان نادر وبيتجاب من بلاد بعيدة في وسط آسيا أو أوروبا.. انتهى العصر البرونزي بسبب مجاعات عالمية بيعتقد ان ربما سببها بركان ضخم في آيسلندا انفجر وسحب الدخان حجبت الشمس وسببت موت المحاصيل، ولأن اقتصادات الدول دي كانت مبنية على الزراعة فبالإضافة للمجاعة ضعفت الدول المركزية في العصر ده وحصلت ثورات جياع وزاد الطين بلة ان عدم الاستقرار والقلاقل الأمنية دي عطلت طرق التجارة اللي بيتنقل عبرها القصدير لصنع البرونز وده خلاه معدن شديد الندرة غالي التمن وبقت مهمة تصنيع الأسلحة والأدوات صعبة جداً، دا سرع من انهيار الدول.. مصر هي الدولة الوحيدة اللي قدرت تنجو من التأثيرات دي ونجت من المجاعة بفضل منظومات تخزين الحبوب، مصر اتعرضت لهجمات من شعوب البحر المتوسط اللي كانت بتبحث عن ملجأ وغذاء.. ممالك كتير تانية انهارت ومنها المملكة المايسينية في اليونان، لما انهارت المملكة المايسينية دخلت اليونان عصر مظلم لمدة 400 سنة انتشر فيه الجهل واختفى فيه نظام الكتابة اللي اخترعه اليونانيين القدماء في العصر المايسيني.. هجمات شعوب البحر أسقطت مدن الإمبراطورية الحيثية في الأناضول، وتحالفوا للهجوم على مصر لكن تصدى ليهم رمسيس التالت في معركته الشهيرة عند مدخل النيل في الدلتا.. نقوش المصريين القدماء ذكرت ان شعوب البحر كان منهم شعوب من بحر إيجه واليونان.. المؤرخين بيعتقدوا ان حرب طروادة ممكن تكون حصلت فعلاً، وان قوات مملكة المايسينيين هاجمت طروادة في نهاية العصر البرونزي تماماً، نفس المايسينيين اللي هايبقوا جزء رئيسي من شعوب البحر لاحقاً، وهنا بيظهر نظريتين: 1- المايسينيين هاجموا طروادة بسبب بدء انهيار الزراعة واقتصادهم المحلي وعشان طروادة كانت مدينة غنية بتتحكم في التجارة البحرية عبر مضيق الدردنيل، أنا بميل للنظرية دي. 2- المايسينيين هجموا على طروادة قبل أحداث انهيار العصر البرونزي مباشرة، وانهم رجعوا لبلادهم بعد الحرب لقوا بلادهم بتنهار بفعل المجاعة وانهيار الزراعة فاتجهوا للبحر يبحثوا عن ملجأ وغذاء في هجرات مسلحة. المؤرخين بيقولوا ان مدينة مايسيني عاصمة المملكة المايسينية كانت مدينة عظيمة محصنة بيقودها ملك لقبه "الملك الأعلى" وانه كان بيقود ملوك ممالك اليونان في الحرب، يعني كانت اليونان فيها ممالك مختلفة لكن بيقودهم ملك مايسيني، نفس اللي أسطورة طروادة بتوصف بيه أجاممنون.. غالباً حرب طروادة كانت حرب حقيقية وأبطالها كانوا حقيقيين لكن انتشار الجهل بعد انهيار العصر البرونزي خلى القصة تتناقل شفهياً ويغلب عليها عنصر الأسطورة.. الأوديسة غالباً هي قصة مبنية على عنصر حقيقي اللي هو تيه المايسينيين بسبب تأثيرات انهيار دولهم وخصوصاً بعد الحرب، بقوا شعوب مقاتلة بتتحرك في البحر بلا وطن، لكن عنصر الأسطورة غلب عليها