Treat Theories as Undergarments! म सिद्धान्त विरोधी होइन । लोकतन्त्र, समाजवाद, पुँजीवाद, उदारवाद, फासिवाद, साम्यवाद आदि अवधारणाको अध्ययन गर्नुपर्छ भन्नेमा म पनि विश्वास गर्छु । यी अवधारणाले वर्तमानमा र विगतमा राज्य र नागरिकका सम्बन्ध र तिनमा आएका परिवर्तन बुझ्न सघाउँछन् । तर, राजनीतिक दलका नीति र कार्यक्रमका बारेमा कुरा हुँदा समाजवादी लोकतन्त्र, लोकतान्त्रिक समाजवाद, बजारवादी लोकतन्त्र, लोकतान्त्रिक बजारवाद भन्नेजस्ता बडेबडे अवधारणा वा सैद्धान्तिक धारमाथि बहस र विवाद गर्नु बेकारको बुद्धिविलासजस्तो लाग्छ । संसार हायेक र केन्द्रीकृत योजनाप्रति उनको वितृष्णाको डाइकोटमीको युग पार गरेर धेरै अगाडि बढिसकेको छ । यो सिद्धान्तको 'सिम्यान्टिक' लडाईंको समय होइन -ठोस समस्याको ठोस र प्रभावकारी समाधानको समय हो । एउटा राजनीतिक दलले आफ्नो नीति कस्तो हो भन्ने कुरा आम मानिसलाई बुझाउन जटिल सैद्धान्तिक शब्दावलीको साटो (उदाहरणका लागि) निम्न प्रश्नहरूको जवाफ दिए भइहाल्छ: - जनतालाई स्वास्थ्य सेवा कसरी सुनिश्चित गरिनेछ ? - भूमिको असमान वितरणको अवस्था कसरी अन्त गरिनेछ ? - गुणस्तरीय तथा प्रभावकारी शिक्षा कसरी सुनिश्चित गरिनेछ ? - सार्वजनिक यातायातलाई कसरी विकास र विस्तार गरिनेछ ? - राज्य र निजी क्षेत्रको अन्तर्सम्बन्ध कस्तो रहनेछ ? - जलवायु परिवर्तनका असरको सामना, वातावरण संरक्षण र वातावरणीय न्यायका लागि कस्तो नीति अपनाइने छ ? - प्रेस स्वतन्त्रता, अभिव्यक्तिको स्वतन्त्रता, आवागमनको स्वतन्त्रताप्रतिको प्रतिबद्धता कस्तो छ ? आदि । सिद्धान्त महत्त्वपूर्ण छैन भन्ने होइन । तर, यसलाई undergarments का रूपमा उपयोग गरौँ । भित्र के छ भन्ने सधैं सबैलाई देखाइरहन पर्दैन, न त undergarments हेर्ने चासो सबैलाई हुन्छ । कि कसो ?!