نونمبر

عبيدة ومجموعة من المصممين قرروا يعملوا تحدّي لمدة 30 يوم، وسمّوه ((نونمبر)) 🔥 الفكرة كالتالي// كل يوم شعار جديد، مكتوب بالعربي، ولبراند محدد مسبقًا صراحة ما بعرف كيف بتواصلوا مع بعض لكن فيكم تسألوهم @obaida0M @AhmadFstudio @khalgharabli ومن مكاني كخبيرة بناء علامات شخصية، شايفة إنه هاد مش مجرد تحدّي تصميم يعدي زي غيره هاي فرصة حقيقية لأي مصمم بدّه يُعرف وتُطلب خدماته! خليني خبرك ليش!؟ ١. أفكارك رح تكبر، لأنك كل يوم رح تشوف طرق تفكير مختلفة عن طريقتك. ٢. شبكة علاقاتك رح تتوسع مع مبدعين بنفس مجالك. ٣. شغلك رح يوصل لناس ما كانوا يعرفوك، وكل حد شافك يعني ثقة ويمكن تتحول لفرصة طلب جديدة. ٤. الخوارزميات رح تفهم إنك متخصص، فترشّح محتواك للناس اللي فعلًا محتاجينه. ٥. رح تبني جمهور فاهم قيمة فنّك، والجمهور الفاهم بيوثق وبيدفع ورح تعرف قيمة كلامي مع التجربة. ٦. والأهم إنك رح تطلع من الـ30 يوم وأنت متعوّد على الالتزام والانضباط، وعلى الشغل تحت ضغط الإبداع 7. معرض أعمالك رح يكون ثري وغني ويحكي عنك قديش إنك فنان ومصمم مبدع، وهي فرصة للي ما عنده معرض أعمال يخوص تجربة حقيقية. بس نصيحتي إلك إذا رح تشارك: - احكيلنا القصة ليش اخترت هاد الخط؟ هاد اللون؟ هاي الفكرة؟ تذكر إنه الشعار مع قصته بينحفظ أكثر بدماغنا نحن كجمهور. - فرجينا كيف وصلت للقرار الاسكتشات، الفكرة اللي رفضتها، الزاوية اللي قررت تشتغل منها. بسّط محتواك واكتب بأسلوب قصصي ما في داعي لمصطلحات معقدة. اكتب كأنك بتحكي لصاحبك رح توصلنا أسرع صدقني - حط التصميم بسياقه اللي المفروض يتوظف فيه اعرض الشعار على كوب، على واجهة محل، على كرت شخصي - تفاعل مع غيرك من المشاركين علّق على شغلهم بشكل حقيقي وضيف وجهة نظرك وافتح نقاشات معهم إنت رح تكبر وهم كمان - هيك بتبني علاقات، وبيصير اسمك يتكرر قدام جمهورهم كمان. - خليك مستمر .انشر بنفس الوقت تقريبًا، وبنفس شكل العرض، لحتى يصير محتواك معروف من أول نظرة لأنه بالآخر، الـ30 شعار رح يخلصوا بس الاسم اللي بتبنيه خلالهم هو اللي رح يضل مين فيكم مشارك؟ نزلوا أول شعار إلكم بالتعليقات 👇 وهي مساحتكم لحتى تنظموا #تحدي_نونمبر #شعار_عربي