Nic venter

Die swaard oor Agoa gaan heel waarskynlik môre, 2 November, val en duisende werkers se koppe gaan rol. Die Suid-Afrikaanse regering lyk heeltemal oukei daarmee. Vir meer as tien jaar veg Solidariteit vir Agoa. Selfs tydens die Biden-administrasie het ons voorleggings aan die Amerikaanse kongreskomitees gemaak, want ons kon sien hoe die spanning oor Suid-Afrika se roekelose buitelandse beleid opbou. Daarna het ons ‘n lang geskiedenis gehad van veg vir die land. Ons hou nie, van die regering nie, maar ons is lief vir die land en sy mense. Mense se werk is die rede vir ons bestaan. Dit het lank voor die Trump-administrasie begin. Die regering van Suid-Afrika was ’n formidabele vyand in Solidariteit se stryd vir Agoa. Die SA-regering het alles moontlik gedoen om Agoa te kelder. Dis asof hulle ’n meesterplan ontwikkel het om Agoa te laat val. As Agoa die beskerming van eiendomsreg vereis, wil die regering sonder vergoeding onteien. As Agoa vereis dat Amerikaanse belange en veiligheid nie benadeel word nie, dans die regering met Iran, knipoog hy vir Rusland, hou hy hande met China vas en ontwikkel hy ’n liefdesverhouding met Hamas. As Agoa vereis dat daar nie handelsbeperkings moet wees nie en dat werkersregte billik moet wees, word rasvereistes vir buitelandse maatskappye en raswette in die werkplek strenger. Ironies genoeg moes Solidariteit ten spyte van die regering vir Agoa veg. Sowat 250 000 poste gaan waarskynlik in gevaar wees as gevolg van die regering se roekelose hantering van Agoa. By elke liewe spanningspunt het die regering sy belangrikste handelsvennoot beledig. Dis die SA-regering se skuld as ons uit Agoa geskop word. Agoa is nie ’n reg nie, maar ’n wet wat handelsvoordele onder bepaalde voorwaardes bied. As ons uit Agoa geskop word, is dit ‘n regeringsmislukking. Die SA-regering het elke voorwaarde as ’n uitdaging beskou om dit te verbreek. Die aantal poste wat verlore kan gaan, is gelyk aan die totale aantal werknemers van die vyf grootste mynhuise in SA. Hoe sou die ANC-alliansievennote gereageer het as die regering se optrede direk tot die sluiting van SA se vyf grootste myne gelei het? ’n Burgerlike organisasie, soos Solidariteit, kan net soveel doen om ’n ooreenkoms tussen twee lande te red as die begunstigde land alles doen om die ooreenkoms te kelder. Die SA-regering moet sy kop in skaamte laat sak en Suid-Afrikaners om verskoning vra vir sy mislukking. ’n Regering met selfrespek sou bedank, maar ons regering het nie respek nie. Hulle regeer vir hulself en nie vir gewone mense