Vunga

Jeshi la Marekani limeanza kufanya mafunzo ya kuchimba makaburi makubwa ya pamoja kwa ajili ya kuzika wanajeshi wake watakaouawa vitani, ikiwa ni mara ya kwanza tangu Vita vya Korea. Katika mafunzo hayo, wanajeshi wamefanya mazoezi ya namna ya kuzika miili ya watu 2,400 ndani ya kipindi kisichozidi saa 24 kwa kutumia makaburi makubwa ya pamoja yaliyochimbwa ardhini. Mafunzo hayo yamehusisha wahandisi wa jeshi, wataalamu wa tiba kinga, viongozi wa dini na wataalamu wa usimamizi wa miili ya marehemu. Lengo lilikuwa kujifunza namna ya kushughulikia vifo vya wanajeshi wengi kwa wakati mmoja bila kuharibu miili, ili iweze kufanyiwa uchunguzi na baadaye kurejeshwa kwa familia zao. Jeshi la Marekani limesema kuwa katika vita vya Iraq na Afghanistan, uwezo wake wa kutawala anga uliwezesha miili ya wanajeshi waliouawa kusafirishwa haraka kurudishwa nyumbani. Hata hivyo, limeonya kuwa vita vya baadaye huenda visiwe na mazingira hayo, hivyo kulazimika kujiandaa kwa uwezekano wa vifo vingi vya wanajeshi kwa wakati mmoja.