பாரதி

திருவிளையாடல் திரைப்படம் 1965ல் வெளியானது. படம் வெளியாகி கிட்டத்தட்ட அடுத்த 25 ஆண்டுகளுக்கு B & C சென்டர்களில் ஒவ்வொரு ஆண்டும் ரீ ரிலீஸ் ஆகிக் கொண்டே இருந்தது. சாட்டிலைட் டிவிகள் வந்து மக்கள் திரையரங்குகளுக்கு செல்வதை குறைத்த காலத்தில்தான் அந்த ரீ ரிலீஸ் வைபவம் நின்றது. அந்த அளவிற்கு தமிழ்நாட்டு மக்களின் வாழ்க்கையோடு கலந்தது திருவிளையாடல் திரைப்படம். எங்கள் ஊரில் திருவிழா சமயத்தில் எப்படியாவது இந்த திரைப்படத்தை திரையிட்டு விடுவார்கள். குடும்பம் குடும்பமாக சென்று திருவிளையாடல் பார்த்துவிட்டு வருவோம். அப்படி ஒரு ஆண்டு வராவிட்டால் கூட இன்னும் ஏன் வரவில்லை என்று மக்கள் கேட்கும் அளவிற்கு இருந்த ஒரு திரைப்படம் திருவிளையாடல். தியேட்டர்கள் அனைத்தும் டிஜிட்டலுக்கு மாறிவிட்ட சூழலில், திருவிளையாடல் திரைப்படம் மேம்படுத்தப்பட்டு டிஜிட்டல் அவதாரத்தில் இந்த மாதம் 27 ஆம் தேதி திரைக்கு வருகிறது. தருமி யின் ஆயிரம் பொற்காசுகளையும் ஹேமநாத பாகவதரின் ஒரு நாள் போதுமாவையும் இந்த தலைமுறையும் வியந்து பாராட்டட்டும்.