Ahmed

يعنى الواحد عنده تعليق ومش حيحاسب على كلامه . دلوقتى خطابات تحقير مجانية التعليم واعتبارها مسؤولة عن الوضع الحالى .. هى خطابات سايدة وسط أوسع قطاع من الطبقة الوسطى المصرية - أو اللى كانت وسطى - ومش محتاجين نقول وسط البرجوازية كمان . لدرجة أن التعليم كحق بقى محل نقاش فعلا .. والكلام على مجانية التعليم من أوله لأخره .. ومن ناس هم اصلا معظمهم حصلوا على تعليم مجانى بدرجات متفاوته .. سواء فى ابتدائى او اعدادى او ثانوى أو جامعة . الحقارة دى سايدة .. وسايدة من ناس جهلة وهى متعلمة .. ناس بتكره معنى المجتمع .. سايدة ومنتشرة لدرجة إن اللى بيقول غير كده بيعتبروه غير واقعى وبيقول كلام اشتراكى وما شابه .. فعلا هجين من الضباع والخنازير . الخطابات دى سايدة بقالها فوق الخمسة وعشرين سنة وأكتر .. لدرجة انها وصلت أطيافها لناس المفروض إنها محسوبة على قوى التغيير التقدمى .. لأن محمد البرادعى مثلا كان عنده مشكلة مع التعليم المجانى !! طيب زعلان ليه يا معلم من التنفيذ ؟ زعلانين ليه لما الدبابة خدت فانتاسياتهم ونفذتها .. مش هم اللى زعلان من على أبن الجناينى .. مش شايفين إن ياريت البرنس علاء كان قتله .. ادي الناس مش حتتعلم أصلا اهوه .. ولا فيه لا ابن الجناينى .. ولا الجناينى .. ولا الجنينة نفسها . أنا فعلا مش عارف منين الناس جايبه قدرة على تبنى خطابات يمينية ومنحطة .. وبعدين تتضايق جدا أول ما الضرر بتاعها يقرب منهم ولو من بعيد . لا هو التعليم العام المجانى لما يتلغى أو ينحط أو يبقى بلا معنى .. التعليم الخاص اللى البعض بيدفع فيه فلوس كتير لعيالهم .. سعره حيزيد وجودته حتقل .. وتخيل ايه بقى .. كلها كام سنة ويبقى مستواه أقل من التعليم الحكومى اللى كانوا عايزين يلغوه وشايفينه هو المشكلة .. يورينى بقى حيدفعوا عشرة وعشرين ألف دولار منين ؟ بتحصد اللى بتزرعه .. كل كل انحياز أنانى ضد اجتماعى حيلف ويرد فى صدرك .. السيسى بقى مبيسميش على حد .. ومن الأول قايل لك كل خدمة حلوة أو وحشة لازم تبقى بفلوس .. وكتير من الناس أصلا مش بعيد عن المنطق ده فى التفكير .. فهو بمعنى من المعانى .. قطاعات واسعة بتدفع تمن قناعاتها المتجربعة ... أهو مفيش على حيخش حربية تانى .. ولا حيخش جامعة من أصله .. وحيطلغ عليك بمطوة قبل ما يتم 16 سنة وهو رافع مالذ وطاب من أنواع المخدرات .