Монгол Улсын Ерөнхийлөгч У.Хүрэлсүх НҮБ-ын Ерөнхий Ассамблейн 81 дүгээр чуулганы индрээс эх орныхоо дуу хоолойг дэлхий дахинаа хүргэж, Монгол Улсаас НҮБ-ын дэргэд суугаа Байнгын төлөөлөгч Н.Анхбаяр тус чуулганы орлогч даргаар ажилласан нь нэгэн цаг үед тохиосон онцгой давхцал, Монголын дипломат харилцааны түүхэнд тэмдэглэгдэх чухал үйл явдал байлаа.

НҮБ-ын Ерөнхий Ассамблейн 81 дүгээр чуулганы Өндөр түвшний долоо хоногийн үеэр Бүгд Найрамдах Панам Улсын Гадаад хэргийн сайд Хавиер Эдуардо Мартинез-Ача Васкезтай уулзаж, хоёр улсын харилцаа, хамтын ажиллагааг худалдаа, эдийн засаг, иргэд хоорондын харилцаа болон олон талт хамтын ажиллагааны хүрээнд өргөжүүлэн хөгжүүлэх талаар санал солилцлоо.

Олон талт хамтын ажиллагааны хүч чадал нь та бид огт санал зөрөлдөөнгүй байхад бус, харин тэрхүү ялгаатай байр сууриа яриа хэлэлцээгээр ойртуулж, нийтлэг зорилго, хамтын үйл хэрэг болгон хувиргах чадварт оршдог.

Хөрсний доройтол, цөлжилт зэрэг асуудал аль нэг улсаар хязгаарлагдахгүй. Үр дагавар нь хил дамнан тархаж, эдийн засаг, ард иргэдийн амьжиргаанд нөлөөлж, хүнс, усны хангамж, аюулгүй байдалд заналхийлж, нийтээр нь тогтворгүй байдалд хүргэдэг. Иймээс эдгээр сорилтыг улс орон бүр дангаараа бус, хамтын хүчин чармайлт, олон талт хамтын ажиллагаагаар даван туулах учиртай.

Эх дэлхийгээ хамгаалах, экосистемийг нь сэргээх, энгүй үзэсгэлэнтэйгээр нь ирээдүй хойчдоо өвлүүлэх гэсэн та бидний нийтлэг зорилго, хамтын хариуцлага улам нэгдэн нягтрах учиртай. Бидний өмнө асар том хариуцлага ногдож буй ч түүнээс дутуугүй өргөн боломж нээлттэй байна. Энэ боломжийг хамтын үйл хэрэг болгон хувиргах нь бидний үүрэг юм.

Улаанбаатар хотноо болж буй Цөлжилттэй тэмцэх тухай НҮБ-ын конвенцын Талуудын 17 дугаар бага хурал (UNCCD COP17)-ын хүрээнд COP17-ын Товчооны анхдугаар хуралдаан боллоо. Хуралдааны үеэр COP17-ын нээлтийн хуралдаанаар сонгогдсон Бага хурлын дэд дарга нарт баяр хүргэж, бага хурлын үйл ажиллагааг үр дүнтэй зохион байгуулах, Талуудын хоорондын харилцан ойлголцол, зөвшилцлийг бэхжүүлэх, конвенцын хэрэгжилтийг эрчимжүүлэхэд чиглэсэн бодитой үр дүнд хүрэхийн чухлыг онцлов. Түүнчлэн Товчооны гишүүд өмнөх хугацаанд хэрэгжүүлсэн болон цаашид зохион байгуулахаар төлөвлөж буй уулзалт, арга хэмжээний талаар мэдээлэл солилцоо. Мөн Нэгдсэн хорооны хуралдаан (COW), Шинжлэх ухаан, технологийн хороо (CST), Конвенцын хэрэгжилтийг хянан дүгнэх хороо (CRIC)-ны хуралдааны явцын талаар мэдээлэл солилцов. Эдгээр хуралдааны хүрээнд конвенцын хэрэгжилтийн явц, газрын доройтол, гангийн сорилтыг шийдвэрлэх, шинжлэх ухаан, техникийн асуудал, Талуудын өмнө тулгамдаж буй сорилт, цаашдын хамтын ажиллагааны чиглэлийг хэлэлцлээ. Монгол Улс COP17-ыг даргалагч орны хувьд Талуудын тэгш оролцоог хангах, тэдгээрийн байр суурийг харилцан хүндэтгэх, яриа хэлэлцээг нээлттэй, хүртээмжтэй, зөвшилцөлд суурилсан байдлаар урагшлуулж, бага хурлаас бодитой, үр дүнд чиглэсэн шийдвэр гаргахад анхаарч ажиллаж байна.

Цөлжилттэй тэмцэх тухай НҮБ-ын конвенцын Талуудын 17 дугаар бага хурлын хүрээнд Конвенцын оролцогч Талууд болон иргэний нийгмийн хоорондын Нээлттэй яриа хэлэлцүүлгийн эхний хуралдааныг нээлээ. Хуралдаанаар Засгийн газар, олон улсын байгууллага, хувийн хэвшил, эрдэм шинжилгээний байгууллага, иргэний нийгэм, орон нутаг, уугуул иргэд, залуучуудын хамтын ажиллагааг бэхжүүлж, дэлхийн түвшинд хүлээсэн үүрэг амлалтыг бодит үйл ажиллагаа болгон хэрэгжүүлэхийн чухлыг онцоллоо. Мөн Нээлттэй яриа хэлэлцүүлгээс гарч буй санал, санаачилга, шийдлүүдийг COP17-ын үр дүн болон цаашдын хамтын ажиллагаанд тусгаж, оролцогч талуудын дуу хоолойг бодит үйл хэрэг болгох нь бидний чухал зорилт юм. Хэлэлцүүлгийн үеэр газрын нөхөн сэргээлтэд орон нутгийн болон уугуул иргэдийн мэдлэг, туршлагыг шинжлэх ухаан, инновац, тогтвортой санхүүжилттэй хослуулахын ач холбогдлын талаар санал солилцлоо. НҮБ-аас 2026 оныг Бэлчээр ба нүүдлийн мал аж ахуй эрхлэгчдийн олон улсын жил болгон зарласантай холбогдуулан тогтвортой хүнсний тогтолцоог хөгжүүлэх, газрын доройтлыг бууруулахад чиглэсэн бодит шийдэл, сайн туршлага, санхүүжилтийн боломжийн талаар оролцогчид байр сууриа хуваалцав.

Бүгд Найрамдах Кени Улсын Байгаль орчин, уур амьсгалын өөрчлөлт, ойн аж ахуйн сайд Дебора Млонго Барасаг хүлээн авч уулзлаа. Сайд Д.Бараса Кени Улсын төлөөлөгчдийн тэргүүнээр COP17-д оролцож байна. Уулзалтын үеэр Монгол Улс хүлээн авагч болон бага хурлыг даргалагч улсын хувьд COP17-ын хэлэлцээг нээлттэй, ил тод, хүртээмжтэй, зөвшилцөлд суурилсан уур амьсгалыг өрнүүлж, Талуудын байр суурийг ойртуулан бодитой үр дүнд хүргэхийн төлөө ажиллаж буйгаа илэрхийллээ. Сайд Д.Бараса COP17-ын хүрээнд цөлжилт, газрын доройтол, гангийн сорилтыг шийдвэрлэхэд олон улсын хамтын ажиллагаа, улс орнуудын туршлага солилцоо болон бодит хэрэгжилтийг эрчимжүүлэх нь чухал болохыг тэмдэглэв.